Perintah nengeri chakah ngetanka adat, main asal
Ngambika main asal pupu bansa enda punas ketegal pemansang teknologi ti nadai tatak
KUCHING: Perintah nengeri endang seruran chakah begulai enggau ejensi bekaul nyaga, ngintu sereta nentuka adat pesaka, jaku enggau main asal pupu raban bansa di nengeri tu enda punas pia aja. Tu berindik ari dunya ti majak moden sereta jampat berubah ketegal pemansang dalam dunya teknologi ti nadai betaka.
Kepala Menteri Datuk Amar Abang Johari Tun Openg madahka Sarawak iya nya nengeri ke ngembuan mayuh sejarah, adat pesaka lalu nyadi palan diau ngagai urung lebih 40 etnik enggau sub-etnik ke udah diau enggau likun, beserakup enggau pangan diri, bejaku ngena mayuh macham bansa jaku sereta ngembuan adat pesaka ke nyelai ari pangan diri.
“Pemayuh pupu bansa sereta pengarap ke enda sebaka enggau pangan diri baka tu, enda tau enda dijaga enggau manah laban enggai ke punas ngapa.
“Tang utai ke deka ditanya aku, chukup ke enda inisiatif komuniti kitai tu lebuh sekeda jaku sereta main asal kitai napi pemunas?,” ku iya.
Abang Johari ti mega Menteri Pemansang Mengeri enggau Pengeraja Asal nandu baru madahka jaku orang asal ukai semina diperatika nyauka punas ketegal mayuh jaku baru ke pansut baka Jaku Melayu, enggau Jaku English, lalu kelimpah ari nya, ketegal pemisi jaku sereta main asal bukai, ke lebih diterima nem- biak rebak baru sereta empas iya enda ngira renggat umur komuniti di nengeri tu.
“Nya alai, diatu mih maya pemansik nyengkaum ketuai pupu raban bansa ari mayuh komuniti di nengeri tu patut bekerejasama enggau Palan Pelajar Tinggi (IPT) nengeri tu tauka di luar.
“Perintah bela deka nyaga sereta ngangkatka jaku bansa asal sereta adat pesaka, ngambika agi ulih dipeda sereta di dinga raban rebak baru jemah ila,” ku iya.
Iya madah munyi nya lebuh bejadika ‘2nd International Conference on Language Studies’ ( iCLS) 2017 ke ngena rambai jaku ‘Sustaining Languages and Cultures: Borneo and Beyond’ ti diatur Universiti Malaysia Sarawak (UNIMAS) di sebuah hotel ditu, kilah ensana.
Konferen dua hari nya bela digulu urung 200 iku pesereta ke bisi sama enggau ari serata dunya ke udah baum ditu lalu bejuraika pansik sereta inovasyen sida bekait enggau pelajar.
Ba atur pengawa nya mega, sempekat Pemereti Ati (MoU) bisi disain entara UNIMAS enggau Pustaka Negeri Sarawak, kena ngenegapka kerejasama entara kededua opis nya, ke deka ngemeratka kerejasama ngena pengelandik sida sereta ngumpul data kena ngenegapka dokumen jaku sereta nyaga jaku enggau main asal komuniti menua tu.
Sebedau nya, Mandal Canselor UNIMAS, Prof Dato’ Dr. Mohamad Kadim Suaidi dalam jaku iya madahka pemansang dunya kemaya hari tu, bisi empas ba jaku sereta adat pesaka kitai di dunya tu.
“Kitai seruran mendingka cherita pasal jaku komuniti nyau nyadi punas, sereta adat pesaka kitai pan punas ketegal mayuh penanggul baka penusah ngenyit, perang, ‘genocide’, penyarut politik sereta ke bukai,” ku iya.
Nitihka ripot ari UNESCO, ku iya, setengah ari jaku dunya diatu deka punas manggai taun 2100, lalu tu nyengkaum jaku ke nyauka punas di Asia, ambika chunto di Malaysia jaku ‘Kristang’ iya nya jaku komuniti Portugese-Eurasian di Melaka, Kejaman enggau Miriek iya nya jaku komuniti Seru enggau Lelak diripot udah punas.
“Tu maya ti engkeman kitai mutarka penanggul tu sereta betatika pemerat jaku bansa asal tu, ngambika nya ulih seruran ‘idup’ lalu terus dijaga,” ku iya.
Ku iya, UNIMAS seruran nyadi piak ti keterubah nyaga jaku sereta adat pesaka Sarawak.
Universiti tu mega udah ngaga kerejasama enggau perintah nengeri Sarawak, penanam puku enggau komuniti ngemansang sereta bejalaika projek nyaga jaku sereta adat pesaka nengeri tu.
Ari penyiru nyaga jaku sereta adat pesaka Sarawak, UNIMAS udah muka Fakulti Jaku enggau Komunikesyen.
Naka kediatu, palan tu bisi nyendiaka pelajar tikas Degree dalam Linguistik alai Jaku Iban, Bidayuh enggau Melanau bisi diajar.
Sama bisi enggau ngulu atur pengawa tu iya nya, Menteri di Opis Kepala Menteri (Integriti enggau Ombudsman) Datuk Talib Zulpilip, Menteri Muda Pelajar enggau Pansik Teknologi Dr Annuar Rapaee, chairman Board of Directors UNIMAS Datu Hatta Solhi, Sapit Direktor DBP Datuk Abg Salahuddin sereta Direktor Opis Pelajar Sarawak ( JPNS) Rakayah Madon.
Pemayuh pupu bansa sereta pengarap ke enda sebaka enggau pangan diri baka tu, enda tau enda dijaga enggau manah laban enggai ke punas ngapa. Datuk Amar Abang Johari Tun Openg Kepala Menteri