MAIS nyerahka 15 buah tabika enggau tadika ngagai KEMAS
KUCHING: Lima belas buah tabika enggau taska, dua puluh enam pengajar sereta pemantu ari baruh pegai Majlis Islam Sarawak (MAIS) diatu udah diserah ngagai Opis Menteri Pemansang Menua Pesisir enggau Kandang Menua (KKLBW) ke deka dipejalaika Opis Pemansang Komuniti (KEMAS).
Sapit Menteri Datuk Alexander Nanta Linggi ngarika Menteri KKLBW madah, ari baruh pegai KEMAS begulai enggau MAIS, penyampau tabika enggau taska bisi 44 buah, lalu diatu ari penyampau nya,semina 15 buah dulu deka diserah ngagai KEMAS, ku iya.
“Naka ke diatu, semina tiga buah tabika enggau 15 buah taska, 26 iku pengajar ke ngajar ba palan ngajar anak mit tu, diserah ngagai KEMAS, nyengkaum operasi, (pentadbiran) sereta pelajar,nyengkaum gaji pengajar, lalu semina aset aja ke agi baruh pegai MAIS.
“Batang tuju nyerah ngagai KEMAS ngambika tusun pelajar sereta aktiviti ke digaga ba palan nembiak nya ulih digaga sebaka enggau rengat pra-sekula di tabika enggau taska ke diempu KEMAS,” ku Alexander.
Iya madah munyi nya lebuh bejaku ba aum media pengudah besaksika Sempekat Pemereti Ati (MoU) ngibun, ngatur serta bejalaika operasyen tabika enggau taska masjid (MAIS) ke diserah ngagai KEMAS ba Bilik Aum di Wisma Bapa Malaysia ditu, kemari.
Alexander ti mega Kaban Parlimen (MP) Kapit ma- dahka ba pemansang ke diberi ngagai pengajar ke ngajar tabika enggau taska tu, deka diberi peluang ngulihka diploma sida nengah kus ke setipak enggau pengawa sida ngajar anak mit di tabika enggau taska.
“Engka jemah ila, sida ke nyadi pengajar tauka ngibun anak mit di KEMAS tu deka diambi gawa ba opis perintah nyentuk manggai ba pangkat S29,” ku iya.
Ku ya nandu baru, bedau lama tu tadi, bup ‘Readers’ Digest ’meri kelala KEMAS nyadi siti ‘brand’ ke pemadu ulih dikarap kelebih agi ba pekara pra-sekula, pelajar tumu anak mit, ku iya.
“Tu siti kelala ke besai ke KEMAS,” ku iya.
Ba aum media nya, Sapit Kepala Menteri Datuk Amar Awang Tengah Ali Hasan ngarika Kepala Menteri Datuk Amar Abang Johari Tun Openg, madahka pengawa ke digaga MAIS nyerahka 15 buah tabika enggau tadika sida ngagai KEMAS, disambut enggau manah.
Pengawa nyerahka tabika enggau taska tu ku iya,nyukung pengawa meri pelajar tumu ke anak mit ke belajar tauka dijaga MAIS, lalu disambung KEMAS.
“Pelajar tumu tu beguna amay ba pengawa kitai deka meda komuniti ngembuan pelajar. Enti kitai nadai pemungkal ari umur sida ke agi mit, kitai enda ulih ngembuan nembiak ke mujur dalam pelajar sida,” ku Awang Tengah.
Awang Tengah ti mega Menteri Pemansang Mengeri enggau Pengeraja Asal madah baru, siti ari pemerat iya nya deka meda sebuah menua ke mujur sereta besemekih dalam dunya ke betatika pengelandik sereta penemu, pelajar nya mih ke dikemerat,” ku iya.
Pelajar ulih ngelatih rebak baru ke bisi pengulih, landik lalu tu beguna amat dikena kitai nyingkang jauh agi sereta ngangkatka ekonomi enggau pengelantang pendiau komuniti.
“Di Sarawak, kitai betatika proses pengawa industri bepelasarka teknologi tinggi kelebih agi lebuh diatu kitai diperansang ngembuan penemu ba Ekonomi Digital.
“Kitai ukai semina deka meri penemu ngagai anak kitai pelajar ari pemun, tang dalam timpuh ke sama tu mega, ngambika sida patih,”ku iya.
Chairman MAIS, Datu Misnu Taha madahka pengawa MAIS nyerahka tadika enggau tabika ngagai KEMAS siti pengawa ke dipuji lalu ngipak pemansang pelajar ke majak bepelasarka teknologi tinggi.
“Aku berasai temegah ati laban sempekat tu mujur digaga lalu diserah ngagai KEMAS.
“Tu siti pengawa ke ngipak pemoden pelajar kemaya hari tu, lalu bala nembiak kitai patut diberi peluang tu,” ku iya.
Taja pan, baru 15 buah tabika enggau taska diserah ngagai KEMAS ku iya, ke bukai nya deka diserah chara berenggat.
Sama bisi enggau ngulu aum media nya kemari, Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit, Datuk Fatimah Abdullah, Menteri Muda Orang Indu, Ruang Bilik enggau Pemansang Anak Mit, Rosey Yunus, Kepala Direktor KEMAS, Dato Amiruddin Ariffin enggau Direktor Biro Servis Pelajar, MAIS, Datu Dr. Abd Adi Badiozaman Tuah.