Jalai jai, enda likun meri empas negatif ngagai industri dagang temuai
MIRI: Jalai ti jai sereta enda likun deka nyadi penanggul ngagai pengawa ngemansangka industri dagang temuai di sitak Telang Usang, kelebih agi Baram.
Kaban Kunsil Nengeri (ADUN) Telang Usan Dennis Ngau madahka sitak nya endang chukup benasit laban bisi kandang menua asal enggau rampa menua ti manah kelimpah ari penyelai main asal enggau adat ti dikembuan mayuh bansa.
“Tang chukup sayau, komuniti ti diau di kandang menua tu agi enda ngena enggau memanah peluang ke bisi laban pendiau jalai ti jai lalu tusah deka dilawa,” ku iya.
Bejaku ba pengerami nyuaka setipikit ngagai pesereta ke nyereta latih pengelikun chara deriba entukar 4x4 ke digaga ba palan endur ngelantangka ati wong Tenyok, Long Bedian bedau lama ti udah, Dennis madah semua jalai di kandang menua nya kelebih agi di sitak iya, agi mengkang jalai batang ke bedau dikemanah.
“Jalai tu ulih nyadi jai agi sereta luchak nyema musim pengujan lalu bedebu nyema kemarau.
“Kelimpah ari nya chara deriba enggau navigasyen mega endang bebida ari jalai di mengeri lalu ungkup sida ke bedau kala nengah jalai bansa tu, dilalau enda mai perengka pengangkut kediri aja,” ku iya.
Ku Dennis, diatu komuniti ke teleba enggau sistem jalai batang ulih nyediaka servis perengka pengangkut mai temuai ari menua luar ngerenchah kandang menua pesisir di Baram.
Beserimbai enggau nya, Dennis muji pengawa digaga Gerempung Pengempu 4x4 ke udah ngatur latih ti bansa nya ngagai kaban sereta orang ti ngempu entukar 4x4.
“Pengelikun temuai enggau pengusung patut dikemerat. Kes ti nyadi baka perengka pengangkut ti mai temuai ti tepawah ke darung tauka bebadi iya nya ketegal salah navigasyen ba jalai batang, ti semina deka meri empas ke enda manah sereta negatif ngagai sida sereta pengawa ke deka ngemansangka industri dagang temuai di Baram,” ku iya.
Dalam pekara tu, iya mega udah ngelalau bala orang ti ngena jalai batang ngambika nitihka atur sereta ngena chara deriba ke engkeman.
Dennis madah, nyentukka seharitu, semina 108 kilometer jalai batang ti semanjai 5,000 kilometer di sitak Telang Usan udah diambi perintah, sepengudah kompeni batang ngetuka pengawa sida ba sekeda endur.