Pengajar kreatif, inovatif ulih nempa nembiak ti nyulut
SRI AMAN: Pengajar ti kreatif enggau inovatif ulih ngadaka raban nembiak sekula ti nyulut seriris enggau peminta menua.
Kaban Kunsil Nengeri (ADUN) Lingga Simoi Peri madah, pengajar ke ngembuan kededua pekara tu endang seruran berunding ngubah sistem ngajar sida ngagai tikas ke manah agi.
“Beserimbai enggau nya, kitai ngelalau bala pengajar di nengeri tu ngambika ngubah chara sida ngajar ti suba ngagai gaya ti kreatif enggau inovatif agi lebuh sida ti ngajar.
“Chara ti kreatif enggau inovatif tu ulih matak pengingin nembiak sekula ba subjek ke diajar,” ku iya madah.
Iya madah munyi nya lebuh ti bejaku bejadika Program Peransang Pelajar Sekula Primari Kunsil Nengeri (DUN) Lingga ke diatur Palan Servis Komuniti DUN Lingga ba Balai Gran Stumbin ditu, kemari.
Ku iya, pengajar patut landik ngubah gaya ngajar sida ke ulih diterima ngambika tetiap subjek ti diajar diterima nembiak sekula enggau manah.
“Tu endang dikemerat laban bala nembiak deka rindu ke subjek nya nyema chara pengajar sida nitihka ubah jeman kemaya hari,” ku iya nambah.
Berindik ari nya, Simoi mega minta bala apai indai ngambi ngemeratka pelajar anak sida laban sida deka nyadi pemesai ke pesaka ti deka ngemansangka menua.
“Kitai ti ngyadi apai indai anang sekekali ngelengkaka tanggungpengawa kitai ngajung bala anak ke sekula dikena ngulihka penemu enggau naka ulih laban jeman ke diatu, penemu tu endang pekara ti dikemerat,” ku Simoi nambah.
“Anang sekekali kitai ngerunding nganjung anak ngagai sekula ke tating penusah tang patut mikirka pekara ti nyadi jemah ila,” ku iya.
Ku Simoi, kurang penatai pemisi mega ukai kebuah kitai enda nganjung anak ke sekula.
“Udah mayuh ruang bilik ke kurang penatai pemisi nganjung anak sida ke tikas ti tinggi agi lalu bulih pemujur di universiti,” ku iya.
“Aku pechaya mayuh apai indai diatu udah mereti ke pengawa sida ti patut ngangjung anak besekula laban sida (apai indai) nemu pelajar nya aja ti ulih ngubah tikas pengidup kitai.
Bekaul pekara pemansang teknologi pemadah enggau komunikasyen (ICT), Simoi madah bala nembiak sekula diatu patut nyikap diri enggau penemu ICT laban nya endang beguna kelebih agi lebuh besemekih ngiga kereja.
“Apai indai ti empu tanggungpengawa ngansak bala anak belajarka ICT. Nyema anak kitai enda landik dalam ICT, sida deka napi pemar besemekih enggau nembiak bukai ngiga kereja jemah ila,” ku Simoi.