Urung 600,000 iku mensia mayuh udah ngulu BCF 2017

SIBU: Urung 600,000 iku bala pengusung ti udah datai ngagai Pengerami Mantaika Main Asal Borneo (BCF) 2017 ke digaga 20 nyentuk 29 Julai nyin kemari.

Sapit Chairman Majlis Perbandaran Sibu ( MPS) Rogayah Jamain madahka penyampau tu besai agi ari ke udah dirikod ba taun 2016.

“Timbal sereta penyereta ari mensia mayuh endang chukup manah lalu sida dekaka mayuh agi elemen main asal diayanka.

“Sida madah mayuh pekara udah ditambah-manah enti dibanding enggau taun-taun ke udah,” ku iya madah ngagai pengarang berita.

Lebuh ditanya sekalika pengerami nya deka digaga besai agi taun nyin ila, Rogayah madah, semua nya nitihka agih belanja ti diberi.

“Tang udah tentu kami deka ngemanahka atur program maya nya ila (BCF),” ku iya madah.

Ku Rogayah, entara utai ti narit mensia mayuh datai iya nya ‘Pintu Gerbang BCF’.

‘Pintu Gerbang BCF’ nya mega nyadi palan endur bejadika BCF 2017 ke dipenyadi Menteri Dagang Temuai, Seni, Main Asal, Nembiak, Lumba enggau Main Datuk Abdul Karim Rahman Hamzah.

Abdul Karim dalam jaku iya madahka pengerami bansa tu nyadi pelasar ti engkeman dikena mandangka main asal, pesaka sereta etnik ke bebida ti bisi di nengeri tu.

Ku iya, pengerami tu digaga ukai semina ungkup rayat Sarawak tang ungkup semua, sekalika rayat menua tu tauka peranak menua luar.

“Ya... Nitihka penemu aku BCF tu mega ulih entara chara dikena ngelakuka Sibu enggau Sarawak ari dalam enggau luar,” ku Abdul karim nambah.

Ba kenang ke bukai, pengawa nutup pengerami nya udah dipenyadi Menteri Dagang Entarabansa enggau E-Dagang Dato Sri Wong Soon Koh.

BCF tu terubah diatur iya nya ba taun 2002.