Uggah nguluka raban iya nemuai seraya ngerandang peluang bekerejasama enggau kompeni ari China

SHENZHEN: Delegasyen ti betuaika Sapit Kepala Menteri ti mega Menteri Betanam Betupi Moden Tanah Adat enggau Pemansang Kandang Mengeri, Datuk Amar Douglas Uggah Embas bisi nemuai ngagai dua buah kompeni ke pemadu besai di menua China.

Delegasyen nya bisi nemuai ngagai Indu Opis BYD Corporation ( BYDY) iya nya sebuah kompeni China ti nguasa pengawa ngaga sekeda produk teknologi kelebih agi ba produk IT, batteries and power storage solutions, automobil enggau mass transportation.

Tuju penemuai nya dikena ngerandang peluang kerejasama enggau BYD sereta ngelala bagi produk enggau chara kompeni nya ngatur pengawa ti bekaul enggau ekonomi digital Sarawak.

Nya sebagi ari penemuai rasmi seminggu ngagai Shanghai enggau Shenzhen dikena ngiga inisiatif ‘benchmark’ digital ekonomi ba kededua mengeri nya.

Maya ke nemuai ngagai BYD, raban ari Sarawak nya diberi penerang pasal motivasyen, kuing, faktor peny- ulut enggau pemansang sumber manusia BYD ke nyadi pengeluar electric vehicle (EV) enggau Plugin Hybrid Electric Vehicle (PHEV) di dunya.

Berebak nggau nya kededua piak betukar penemu bekaul enggau pengulih pemansut, nyadung enggau asil jual produk BYD baka bekaul enggau bas elekterik enggai monrail di Sarawak ungkup makit menua enggau serantau.

Kelimpah ari nya delegasyen Sarawak nya bisi mega nemuai ngagai indu opis Tencent Holding Limited ( Tencent) iya nya sebuah kompeni internet ke pemadu besai di dunya, ti bulih penguntung tauka penatai pemisi tebal agi ari main nengah ‘online’.

Kompeni nya bekunsi seling bakani ulih angkat mansang ari semina nyendiaka servis pesan online ngagai tauka nyadi sebuah kompeni ti bepemisi di dunya sehari tu.

Pekara ke dipekunsi nyengkaum model dagang, budaya korporat, produk enggau pemar ke ditapi Tencent. Entara ke bekaul enggau digital ekonomi Sarawak iya nya chara mayar WeChat ba Online.