SOP OSTPC mujur dilanchar kemari
KUCHING: Kabinet nengeri udah ngemendarka Opis Residen nyemakaka pengawa nyiri tuai rumah enggau ketuai genturung pendiau di nengeri tu.
Menteri Utiliti Dato Sri Dr Stephen Rundi Utom madah, perintah nengeri benung mansik chara dikena nentu tauka kriteria orang ke patut nyadi ketuai ba rumah panjai enggau genturung pendiau.
“Kitai perintah nengeri benung mansik baka ni kitai ulih nentuka gaya orang ke ulih dipilih nyadi tuai rumah sereta ketuai raban bansa, ambis nadai ulih macha enggau ke bukai.
“Kitai udah bulih pemendar ari kabinet iya nya ngemendarka Opis Residen nyemakaka pengawa nyiri tuai rumah enggau ketuai raban bansa (ketuai genturung pendiau).
“Ari tu sida residen ulih nyendiaka kriteria ke patut ungkup sida (tuai rumah enggau ketuai raban bansa ),” ku iya dalam aum pengarang berita ditu, kemari.
Dulu ari nya Dr Rundi bejadika pengerami nyuaka perais ‘Anugerah Desa Perdana Peringkat Negeri’ ke diatur KKLW ba Kompleks Kunsil Nengeri (DUN) Lama ditu, kemari.
Lebuh ke bejaku ba pengerami nya, iya madah ngemansangka genturung pendiau di nengeri tu, seiti ari agenda besai ti dikemeratka perintah nengeri.
Pekara ti dipekuhka perintah iya nya pengawa nyendiaka perengka guna mensia mayuh ke amat diguna kelebih agi peranak genturung pendiau di nengeri tu.
“Tu nyengkaum nyendiaka bekal ai beresi, bekal kuasa karan enggau infrastruktur jalai alun ti manah.
“Berindik ari nya, perintah nengeri nengah kerejasama Opis Menteri Menua Pesisir enggau Kandang Mengeri (KKLW) udah ngatur langgur pemansang ba genturung pendiau tauka rumah panjai di kandang menua pesisir.
“Entara kerejasama ke dipejalaika enggau KKLW baka program Bekal Ai Menua Pesisir (BALB), Bekal Kuasa Karan Menua Pesisir (BELB), Jalai Menua Pesisir (JALB), Lampu Jalan Nuju Genturung Pendiau ( LJK), Program Lonjakan Mega Luar Bandar ( PMLB) enggau Program Pemansang Kandang Menua (PPK) sereta mayuh agi program ke bukai,” ku iya.
Kerejasama nya ku Kaban Kunsil Nengeri (ADUN) Kemena, dipejalai ngambika pemansang ekonomi di nengeri Sarawak ulih dikerembaika ngagai genturung pendiau enggau menua pesisir lalu ulih diasaika semua rayat.
“Tu mandangka perintah enda kala ninggalka pemansang di kandang genturung pendiau enggau menua pesisir di nengeri tu,” ku iya.
Lebuh ke ngenang pasal Anugerah Desa Perdana ( ADP), iya arap bendar nya ulih ngemujur pengawa perintah nengeri ti deka nyadika genturung pendiau di nengeri tu nyadi ke pemadu manah di menua tu.
Nengah program ADP ku iya, penyulut genturung pendiau di menua kitai ulih diperatika.
“Tu mega seiti indikator dikena nempa raban bansa ti nyulut senipak enggau juluk perintah ti deka nempa Malaysia nyadi sebuah menua maju enggau bepenatai pemisi tinggi lebuh manggai taun 2020.
“Nambahka nya ulih mantu ngangkatka penyulut dalam mayuh aspek baka penaluk ke menua enggau raban bansa, pelajar enggau latih, ngenegapka tanggungoengawa nembiak, teknologi pemadah enggau penyambung, pemeresi enggau pengerai sereta chara nyaga infrastruktur mensia mayuh ba kandang menua pesisir.
“Penyulut genturung pendiau enggau rumah panjai tu udah nyadi ‘role model’ tauka mentor ngagai ke bukai,” ku iya.
Sama bisi datai ba pengerami nya kemari Sapit Menteri KKLW Datuk Alexander Nanta Linggi, Sapit Ketuai Sekretari KKLW Azizan Mohamad Sidin enggau bala ADUN enggau ke bukai. KUCHING: Standard Operation Procedure( SOP) One Stop Teenage Pregnancy Committee (OSTPC) dilanchar Menteri Pengintu Pengelantang, Komuniti, Orang Indu, Ruang Bilik enggau Pemansang Nembiak Datuk Fatimah Abdullah kemari.
Nitihka penerang ari Fatimah, SOP OSTPC nya dikena ngintu sereta ngurangka kes penyampau kes nembiak betubuh bisi di Sarawak.
“Statistik nembiak betubuh bisi udah nurun 14.7 peratus ba taun 2016 enti dibandingka enggau 2015.
“Kitai udah netapka KPI ngambika penyampau kes nembiak betubuh bisi nurun 10 peratus tiap taun enti dibandingka sebedau tu,”ku Fatimah.
Iya pechaya peratus ke nurun nya asil pengawa manah ke digaga Komiti dalam OSTPC di tetiap pelilih menua di Sarawak.
Fatimah nambah, ungkup timpuh bulan Januari nyen- tuk ngagai Jun 2017, penyampau 1,135 kes bisi dirikut ke alai ba taun 2016, Sarawak ngerikod 2, 481 kes .
“Pekara tu mandangka Komiti OSTPC ke ditubuh kenyau 2014 udah mandangka empas ke positif,” tandu Fatimah.
Tajapia ku iya, Sarawak mengkang ngerikod kes nembiak betubuh bisi ke pemadu tinggi di Malaysia iya nya entara 6.4 nyentuk ngagai 9.9 peratus ari penyampau indai ke ngerijista diri betubuh bisi.
Ungkup renggat menua semina 2.4 nyentuk ngagai 4.1 peratus aja, tandu Fatimah.
Dulu agi ari nya, Fatimah ngulu aum begulai enggau raban OSTPC serata nengeri ke diatur di sebuah hotel ditu.
Ba pengawa nya mega, Fatimah bisi ngelanchar kad nembiak betubuh bisi.
Ba taun 2012 penyampau kes nembiak betubuh bisi ba ikas 4,131, 2013(4,075), 2014 (3,396) enggau 2015(2,910).