‘Desa Digital’ deka ditumbuh di menua pesisir
Perambu nya deka dipejalaika nengah kerejasama enggau Opis Menteri Penyambung enggau Multimedia
KUCHING: Opis Menteri Pemansang Menua Pesisir enggau Kandang Mengeri (KKLW) beperambu deka numbuhka ‘Desa Digital ‘di menua pesisir.
Menteri Opis nya, Dato Sri Ismail Sabri Yaakob madah, perambu nya deka dipejalaika nengah kerejasama enggau Opis Menteri Penyambung enggau Multimedia (KKMM).
“Opis menteri bisi perambu numbuhka Desa Digital bekerejasama enggau KKMM dikena nyukung sereta ngangkatka sistem meri servis ngagai rayat di menua pesisir nengah pengawa nyendiaka bungkur internet ti besai sereta tegap.
“Tuju nya dikena meransang pemansang sosioekonomi enggau pengelantang rayat.
“Penumbuh Desa Digital tu deka nyukung enggau ngukuhka agi aktiviti orang dagang enggau pengawa dagang di menua pesisir sereta nyungkak ekonomi di menua pesisir,” ku iya.
Ismail Sabri mansutka pekara nya dalam teks jaku pengelalu iya ke dibacha Sapit Menteri iya Datuk Alexander Nanta Linggi ba pengerami nyuaka perais ‘ Anugerah Desa Perdana Peringkat Negeri Sarawak’ ke diatur ba Kompleks Dewan Kunsil Nengeri (DUN) Lama, ditu kemari.
Pengerami nya udah mujur dipenyadika Menteri Utiliti Dato Sri Dr Stephen Rundi Utom ngarika Kepala Menteri, Datuk Amar Abang Johari Tun Openg.
Nambahka nya, Ismail Sabri madahka opis menteri iya bejalaika inisiatif nyediaka pelasar bekunsi penerang genturung pendiau sereta rumah panjai enggau semua ke patut nengah aplikasyen ‘iDesa’.
Nya ku iya, ulih disambung sereta didownload ngena telefon binching nengah aplikasyen Google Play Store enggau Apple App Store.
Sistem data genturung pendiau nya bisi ngerintaika nama 16,000 genturung pendiau ti nyendiaka penerang bekaul perengka guna mensia mayuh, produk enggau penatai ekonomi sereta palan ti manah ke bisi ba kandang menua nya.
“Dikena ngenukuka data nya seruran dikemaru, aku minta kerejasama JKKK/ JKKKP ngaga ngemaruka nya belama,” ku iya.
Lebuh ke ngenang pasal Program Transformasyen Menua Pesisir nengah juluk ‘Membandarkan Luar Bandar’ iya madahka bisi enam batang pekara ti dipekuhka opis menteri iya nya perengka guna di menua pesisir, pemansang nembiak menua pesisir, ekonomi, orang dagang, modal mensia enggau sistem meri servis lalu semua nya dipejalaika ngambika menua pesisir enda tinggal ari segang pemansang menua.
Entara inisiatif ditumbuhka ari baruh program tu iya nya ngenegapka JKKK/JKKKP ke nyadi kereban bejalaika poengawa ba renggat baruh, ngerembai enggau ngenegapka TVET ngagai raban bansa menua pesisir, meransang penyereta raban nembiak ba pengawa dagang, ngerembaika dagang online menua pesisir enggau ke bukai.
Kelimpah ari nya dalam aum pengarang berita, lebuh ke ngenang pasal anugerah nya, Nanta ngarapka anugerah nya ulih meransang peranak genturung pendiau tauka rumah panjai ngambika chakah agi deka ngemansangka diri.
“Program tu meri empas ke manah, laban kitai deka nyapai juluk ngangkatka penyulut iring JKKK lebih agi di Sarawak.
“Kami deka seruran ngemanahka program laban program tu ulih mantu kitai lebih agi genturung pendiau enggau rumah panjai,” ku iya.
Sama bisi datai ba pengerami nya kemari, Menteri Muda Pengelantang Raban Bansa Datuk Francis Harden Hollis, Timbalan Ketua Setiausaha KKLW Azizan Mohamad Sidin enggau ke bukai.
Opis menteri bisi perambu numbuhka Desa Digital bekerejasama enggau KKMM dikena nyukung sereta ngangkatka sistem meri servis ngagai rayat di menua pesisir nengah pengawa nyendiaka bungkur internet ti besai sereta tegap. Menteri Pemansang Menua Pesisir enggau Kandang Mengeri (KKLW) Dato Sri Ismail Sabri Yaakob