Sembiang Merekat lalu Nyiri Bishop Diosis ke-14 diatur 13 Ogos
KUCHING: Gerija Anglika di Sarawak enggau Brunei, ke dikelala nyadi Diosis Kuching deka ngatur pengawa Sembiang Merekat lalu Nyiri Bishop Diosis ke-14 pagila (13 Ogos).
Iya ke deka nyadi Bishop nya, Revd Danald Jute, dipilih Dewan Uskup Zon Gerija Anglika di Asia Tenggara, nyilih Right Revd Datuk Bolly Lapok, ke udah pinchin.
Pengerami nya deka diatur ba Katedral St thomas, Jalai McDougall ditu, ti berengkah enggau pengawa bejalai pukul 4 lemai ari Balai Paroki.
Ketuai sembiang Merekat iya nya Archbishop Zon Gerija Anglika di Asia Tenggara, Most Revd Datuk Ng Moon Hing.
Urung 2,000 iku raban Anglika, nyengkaum temuai ari Hong Kong, United Kingdom, Filipina, Mynmar, Amerika Syarikat, Singapura, Semenanjung Malaysia, Sabah, Labuan enggau Brunei dipelabaka bisi datai.
Ketuai gerija ari baruh Gerempung Gerija- gerija Sarawak nyengkaum Gerija Roman Katolik, Gerija Methodist, Sidang injil Borneo, Gerija Seventh Day Adventist enggau Salvation Army, mega dipebaka datai ngemataka pengerami nya.
Raban orang Kristian Anglika di Sarawak enggau Brunei dipelabaka bisi 138,000 iku.
Danald, beumur 51 taun ba bulan November, madahka tuju sembiang tauka iring iya, iya nya “meri servis ngagai anak Tuhan sereta ngiring sida ngambika lebih ngelala Tuhan Yesus kristus sereta ngerapitka agi kaul enggau Iya ngena chara meri Jaku Ajar Tuhan ngagai sida, sereta ngiring ati, dikena nyikap diri nyadi orang tuchi ti lebih manah agi ngambika ulih ngereja pengawa enggau juluk Tuhan, lalu bekunsi enggau orang bukai baka ni ngiga pengidup sereta pengelepas ke mati dalam Yesus Kristus”.
Ba penerang iya empu, Danald madahka entara pekara ti deka balat dikemeratka iya “ngemaruka gereja, releven besembiang,’latihan pemuridan’,’ pelayanan muda- mudi’ sereta ngengapka iring mensia mayuh enggau semua Tubuh Kristus, Gereja”.
Iya sebedau tu nyadi Vikar Gerija Good Shepherd, Lutong di Miri sereta gawa nyadi Kaban Komiti tetap Diosis, penyemaka Ministri Merekat (sektor Utara), Kaban Komiti Liturgi Zon enggau kaban besai Raban Harmoni enggau Masjid An Naim, Lutong di Miri.
Ari taun 2007 ngagai 2009, iya nya Rektor Gerija St Oswald, Kings Park di Glasgow, Scotland; lalu ari taun 2003 ngagai 2007 iya gawa nyadi Rektor Federasyen ba St Andrew’s Milngavie, All Saint Bearsden enggau Drumchaple Congregation di Diosis Glasgow.
Danal mega nyadi Paderi Penulung di Katedral St Thomas ditu ari taun 1998 ngagai 2002, pengelicha ba Balai ba kolej Teologi Epiphany ari taun 1992 ngagai 1998, enggau Penulung Pastrol di Katedral St thomas ari taun 1988 ngagai 1989.
Iya bisi Ijazah Sarjana Muda Divinity (Kehormat) ari Universiti Edinburgh, Scotland enggau Diploma dalam Misiologi ari kolej Teologi Australia nengah Balai Kolej Teologi Epiphany, Kuching.
Danald nirika ruang bilik enggau Julita Jack Sunggul lalu seduai iya bisi empat iku anak - Izra, Iona, Ian enggau Ingrid.