S4S muji pemujur pejalai raban pemansik ke London
KUCHING: Pejalai raban pemesai Perintah Sarawak ke London ti mansik sentang Sempekat Malaysia 1963 (MA63) patut diperundingka Perintah Besai enggau berat, Ku Ketuai Sarawak for Sarawakians (S4S) Peter John.
Peter pechaya, pejalai nya mega mandangka Sarawak udah sedia nguna nama aja chara ke tau nyadi, baikka nya ari sukut politik enggau undang- undang ngambika hak ke disetuju nengah MA63 dipulai ke Sarawak.
“S4S muji pemujur pejalai raban tim nya ke London ti udah tetemuka sekeda penerang ke beguna ke bekaul enggau MA63.
“Kitai dekaka penerang nya diguna enggau naka pemanah ba pengawa mulaika hak Sarawak ke dipesetuju nengah MA63,”ku Peter nengah surat penerang berita kemari.
Iya nambah, pejalai ke London nya nyadi sebengkah atur keterubah ti mandangka Sarawak udah sedia nerima semua hak dipulai ke nengeri tu lalu pinta nya enda tau enda dipajakka berari.
Ku iya, pejalai nya mai pesan ti berat ngagai Perintah Besai ke alai Sarawak sigi bebendar ba pinta tu.
“Sigi amat, penerang tu ulih dipeda sesapa aja nengah chara online ba media rama dalam kandang 20 taun ke udah.
‘Sekalika patut kitai nganjung tim ke London ? Engka enda, tang pejalai sida udah bulih asil ke chukup manah ti mandangka pengering Sarawak.
“Perintah Besai patut berundingka pekara tu enggau berat,’ku iya.
Peter nambah, pengudah 50 taun diau diri Sarawak diatu ngatur diri enggau manah, ngulihka penerang ke beguna ba sentang pinta hak nengah MA63.