Politik ti tegap matak pemeranak puku ke S’wak

KUCHING: Gaya politik Sarawak ti tegap udah narit mayuh pemeranak puku menua luar kelebih agi ari menua China datai beranakka puku di nengeri tu.

Sapit Kepala Menteri, Datuk Amar Awang Tengah Ali Hasan madahka diri arap bendar politik ti tegap enggau polisi ke nyengenda udah nyadi pematak pemeranak puku ari menua luar milih Sarawak nyadi palan beranakka puku.

“Seiti ari kebuah iya laban kitai bisi polisi ti nyengenda; kedua, polisi dagang kitai ‘ friendly’; ketiga, pengelebih kitai ba rega bekal kuasa karan, ai sereta tanah ti kompetatif dibandingka enggau endur bukai.

“Nambahka nya kitai bisi servis mensia mayuh ti efisyen; kelima, langkar kereja ti betul lalu ari nya pemeranak puku enda irau ati meranakka puku laban dilindung sereta keenam kitai bisi pengereja pengawa ke senang dilatih,” ku iya.

Awang Tengah ke mega Menteri Industri enggau Pemansang Orang Da- gang mansutka pekara nya lebuh dikerandau raban pengarang berita ba Wisma Sumber Alam, kemari.

Dulu ari nya iya nerima penemuai balas ari deligasyen Opis Kereja Dagang, Yunnan Province, China ke nyengkaum pegawai ari sektor perintah enggau sektor dagang, ti betuaika Sapit Direktor Opis Kereja Dagang Lou Xiaojuan.

“Kitai endang ngembuan pengereja pengawa ke mudah dilatih ambika chunto ba Samajaya dalam industri elekterik enggau elektronik kitai bisi 10,000 iku pengereja pengawa lalu 99 peratus ari sida nya orang kitai ditu,” ku iya seraya madahka pemeranak puku nya gaga ati laban orang kitai mudah dilatih.

Bejaku baru iya madah, berindik ari gaya politik Sarawak ti tegap, udah mayuh kompeni ari menua China bepalan di Sarawak kelebih agi dalam industri elekterik enggau elektronik kelimpah ari sektor bukai.

Ba Taman Perindustrian Samajaya ambika chunto ku iya, bisi LONGi iya nya sebuah kompeni ke mayuh beranakka puku.

Lebuh ke ngenang pasal penemuai delegasyen ari Yunnan Province nya, Awang Tengah madahka ba penemuai keterubah delegasyen nya deka matau sereta ngelala bagi peluang puku ke ulih diperanak ba nengeri tu.

Tambah mega ku iya, Perintah Sarawak bisi udah nyain sempekat pemereti ati (MoU) enggau Yunnan Province.

“Penatai sida kitu semina deka ngerandang tauka ngiga peluang meranakka puku sereta bidang ke ulih, laban tu penemuai keterubah sida iya,” ku Awang Tengah dulu ari nya meri penerang pasal peluang ke bisi di Sarawak.

Nyempulang Awang tengah nerima penemuai delegasyen nya, Sapit Sekretari Perintah Sarawak ( Transformasyen Sosioekonomi) Datu Ismawi Ismuni, Menteri Muda Industri enggau Pemeranak Puku Malcolm Mussen Lamoh enggau ke bukai.