ADUN Tupong besemaya mantu sida ti diasuh angkat ari Flat Taman Dalia
KUCHING: Sekeda orang ti diau di Flat Taman Dahlia di Matang bisi nerima notis ari Serikat Pemansang Pengawa Berumah (HDC) ngasuh sida angkat ari flat nya, kelimpah tau ngelawa opis HDC enti deka nemu penerang ke silik.
Kaban Kunsil Nengeri (ADUN) Tupong, Fazzrudin Abdul Rahman madah sebarang tanya tauka enti bisi notis ke diterima mensia mayuh ke diau di flat nya, iya empu mega deka mantu mensia mayuh dia nanya ngagai HDC sentang penanggul sekeda ke diasuh angkat ari flat nya.
“Kitai pan patut mereti, pemun suba lebuh kita pindah nyuwa ditu, ni naka gaya perambu HDC maya nya enggau kita? Ni baka gaya pekara ke udah disetuju kita?,” tanya Fazzrudin.
Iya madah sereta nanya munyi tu lebuh nimbal tanya ari seiku orang ke ngarika mensia mayuh ke diau di genturung pendiau di Taman Dahlia, ba atur pengawa berandau entara polis ari Indu Opis PDRM Padawan enggau komuniti di genturung pendiau Taman Dahlia di Matang ditu, kemari.
Nitih ku tanya ari seiku orang ke ngarika komuniti ba Falt Taman Dahlia, sereta genturung pendiau bukai ke semak enggau endur nya, sekeda udah diau dia dalam kandang entara 6 ngagai 10 taun.
Ku orang nya, pekara ke didinga iya, taja pan sida dia nadai berutang enggau HDC, sida pan sama nerima notis diasuh angkat ari flat nya.
Enti nitih konsep ke digaga HDC, semua flat di mengeri tu digaga khas ungkup sida ke kurang pemisi lalu bedau ulih meli rumah, tauka sida ke baru bulig pengawa (bedau meli rumah kediri empu), nyuwa di flat nya enggau suwa pengabis mimit berengkah ari RM150 sebulan.
Taja pia, Fazzrudin nandu, nyema sida iya udah nerima notis ari HDC, sida iya tau nulis surat ngapil ngagai HDC beratika baru sempekat suwa nya, ngambika ulih nyambung suwa dalam timpuh ke baru.
“Nyangka suba lebuh kita pindah kitu, bisi sempekat entara kita enggau HDC, laban HDC pan bisi timpuh ti diberi sida ngagai penyuwa. Nyema pemisi ruang bilik udah bisi nambah, lalu ulih meli rumah bukai, nyangka nya entara kebuah HDC ngasuh pindah, ngambika unit kita nya ulih alai orang bukai ke sama napi penanggul baru gawa tang bedau ulih meli rumah dulu (ambika chunto).
“Taja pia, penanggul entara kita, taja pan udah betaun diau ditu, pemisi pan lalu bedau chukup, bedau ulih meli rumah, gaya bansa tu nyangka bisi lain mimit, nya kebuah aku ngasuh kita betemu enggau HDC,” ku iya seraya besemaya deka mantu mensia mayuh ke diau ba genturung pendiau dia bejaku enggau HDC.