DTTG ngaga ripot bekaul isu kompeni muai staf ti nadai meri notis

SIBU: Dayak Think-Tank Group ( DTTG) pampang Bintulu udah ngaga ripot ngagai Jabatan Perhubungan Perusahaan Sarawak (JPPS) di Kuching, empai lama tu tadi ketegal ti enda lantang ati meda ulah seiti kompeni di Bintulu muai orang gawa enggau enda meri notis tauka timpuh ke chukup.

Pengawa ngaga ripot nya betuaika chairman sida Agat Sagai.

Sepengudah ripot digaga, piak opis nya bisi madahka deka ngatur sebengkah randau begulai enggau kompeni nya di Jabatan Tenaga Kerja (JTK) di Bintulu.

Agat ba jaku iya madah, kena 5 Julai suba, bisi 19 iku orang gawa ba sebengkah kilang di Bintulu di buai gawa enggau chara ti enda nitihka atur.

Sida ke dibuai tu ku iya ari seksyen jaga, pengereja pengawa opis, ‘payroll’ enggau macham bengkah pengawa ke bukai.

“Kitai mantaika pekara tu laban ngasaika pekara tu bechiping ngagai orang ke gawa dia.

“Kitai minta piak ke bekaul ulih bejalaika pengawa ke patut ngagai kompeni nya,” pia ku iya madah, empai lama tu tadi.

Ku Agat, pemadu ngasuh ati siru iya nya bisi sekeda ari sida ke dibuai nya diburu ngenyit ari kaurters.

Iya madah, kompeni nya madahka diri muai orang gawa laban deka ngenyadika agi puku operaysen kelimpah ekonomi diatu majak enda manah.

“Tang maya sida muai sida agi ulih ngaji bansa bukai ari menua bukai enggau sida gawa.

“Enti nunda sida enda patut muai orang tekala nya, enda nitihka atur ke udah ditetapka,” ku iya madah baru.