Perambu berakupka sekula SKM patut disukung apai indai nembiak

SERIAN: Sekeda palan sekula diperambu deka digaga di Serian dikena berakupka sekula kurang nembiak (SKM) ditu.

Menteri Pelajar, Sains enggau Pansik Teknologi, Dato Sri Michael Manyin Jawong madah pengawa numbuhka sekula seiti endur tu deka mai ngagai penyapai akademik manah agi di kandang menua pesisir.

Nya kebuah iya ngarapka apai indai nembiak setujuka perambu tu, berundingka pengidup dudi hari bala anak sida.

“Pengawa begulaika SKM ngambika pengajar ti landik ulih dianjung ngajar seiti subjek, lalu tu deka ngemanahka penyapai akademik nembiak, kelebih agi subjek berat baka Sains enggau Matematik.

“Kelimpah ari nya, bisi mega perengka guna ti manah agi lalu tu deka meransang bala nembiak besemekih,” ku iya rambau bejadika Pesta St John Vianney enggau pengawa bejadika Gerija St John di Kampung Krusen kena malam Hari Enam tu tadi.

Berebak enggau nya, bisi 651 buah sekula di Sarawak enggau penyampau tubuh nembiak kurang ari 150 iku.

Rambau makmal pengelama dua hari dipejalai apin lama ke udah, bisi 1,004 sekula enggau nembiak kurang ari 300 iku.

Penyampau optimum ba penyampau tubuh nembiak di sebuah sekula antara 300 ngagai 400 iku ungkup sekula primary lalu 600 ngagai 1,000 iku di sekula sekondari.

Ba lansa bekaul, Manyin ke mega Kaban Kunsil Nengeri (ADUN) Tebedu ngansak sekula di Serian ngatur mayuh agi program Jaku English.

Ku iya, program ke bansa tu deka meransang bala nembiak bejaku dalam agi ngena Jaku English, ngambika sida landik agi.

Berebak enggau nya, Manyin mega bisi ngemendarka geran RM20,000 ari baruh agih belanja Projek Mit Pemansang Menua Pesisir (MRP) ngagai Gerija St John Krusen.

Sama bisi datai Sekretari Politik Kepala Menteri, John David Nyauh enggau Charles Chad Nissom sereta Residen Serian, Johnathan Lugoh.