Raban pengereja pengawa PRU14 sitak Sarikei udah diberi taklimat

SARIKEI: Pengereja pengawa enggau pemesai ti deka gawa maya Pengawa Bepilih Besai Ke- 14 ( PRU14) ti deka datai, kelebih di sitak Parlimen Sarikei udah diberi penerang nengah Taklimat Pengereja Pengawa Bepilih Ketuai Palan Ngundi enggau Kerani Muai Undi/Ngira Undi, kemari.

Sapit Residen Bagi Menua Sarikei ke lalu nyadi Pemesai Pengatur Pengawa Bepilih, Abang Porkan Abang Budiman madahka program tu diatur nentuka pengereja pengawa enggau pemesai ti gawa maya PRU14 ila nemu senentang tanggungpengawa enggau pangku pengawa sida.

“Rambau program nya, bisi sekeda pekara ti deka diterang enggau nyemetak ngagai bala pengereja pengawa enggau pemesai ti gawa.

“Tu nyengkaum pekara bekaul enggau dini endur palan ngantung nama, palan muai undi, pangku pengawa pemesai enggau pengereja pengawa bepilih,” ku Abang Porkan nerang.

Program pengelama empat hari tu udah diatur di Balai Suarah Sarikei lalu udah digulu 721 iku pengereja pengawa enggau pemesai pengawa bepilih ari sitak Parlimen P208 Sarikei ti nyengkaum pengereja pengawa bepilih ari sitak Bepilih Kunsil Nengeri (DUN) Repok enggau DUN N46 Meradong.

Rambau program nya, bala pesereta udah diberi penerang pasal pangku pengawa Ketuai Palan Ngundi, latih pengawa enggau pangku pengawa kerani muai undi enggau kerani ngira undi.

Berebak enggau nya, bala pesereta program bisi diajar enggau simulasyen pengawa muai undi enggau ngira undi.

Pia mega ku Abang Porkan, iya ngelalau semua pengereja pengawa enggau pemesai pengawa bepilih ti gawa ila memanah bejalaika pangku pengawa, lurus, bisi tanggungpengawa enggau nitihka undang- undang sereta atur pengawa bepilih.