MMEA mujur ngetan dua kapal berikan Vietnam di Tanjong Po
KUCHING: Dua kapal berikan ari menua Vietnam ditan Ijinsi Penerit Adat Maritim Malaysia ( MMEA) urung 185 batu nautika ari Tanjong Po urung pukul 10.45 pagi 10 Ogos tu tadi.
Penyampau 22 iku orang berikan enggau seiku kapten kapal ke beumur entara 16 nyentuk ngagai 45 taun ditangkap lalu deka dipansik nengah Akta Berikan 1985.
“Urung 10 tan ikan bemacham bansa mega udah dirampas,’ ku Direktor MMEA Sarawak Laksamana Pertama Ismail Bujang Pit ba aum pengarang berita di Komplek Maritim Tun Abang Salahuddin( KOMTAS) di Muara Tebas kemari.
Iya nambah, tetiap kapal nya beungkus entara RM5 juta lalu ulih berikan ba tasik pengelama 2 nyentuk ngagai 3 bulan.
“Kitai benasit manah ketegal ulih ngetan kededua kapal enggau orang berikan,”ku Ismail seraya madah enti ditemu salah, tetiap iku sida deka diukum mata duit entara RM100,000 nyentuk ngagai RM1 juta tauka ukum jil.
Nitihka peneranga ari iya, kededua kapal nya mujur ditangkap pengudah nerima ripot ari komuniti maritim.
Ngenang kaul bukai, Ismail madah dalam timpuh bulan Januari nyentuk ngagai Ogos taun tu, penyampau 316 orang berikan ari menua Vietnam udah ditangkap.
Penyampau nya ku iya udah nambah dua kali lipat enti dibandingka enggau taun ke dulu ke alai 189 iku bisi ditangkap.
“Kitai mega ngerikut 67 iti kes kenyau bulan Januari 2017 ti mungkur 26 kapal berikan ari menua luar,’ku iya nambah.