Ketuai komuniti patut chakah ngemansangka gerempung
Kena inisiatif kediri ngambi nambahka belanja gerempung ti ulih pulaika pemaik ngagai komuniti
KUCHING: Tetiap ketuai komuniti patut nemu ngiga inisiatif kediri dikena ngemansangka gerempung, lalu ukai semina ngarapka bantu ari piak bukai pia ku jaku Kaban Kunsil Nengeri ( ADUN) Bukit Begunan Datuk Mong Dagang.
Mayuh chara ti engkeman dikena ngemansangka gerempung, ambika chunto gerempung ti ditumbuh ulih ngaga program tauka aktiviti ke ulih ngempung mayuh agi gerempung bukai. Pekara tu kelimpah ari ngenegutka kaul entara kaban gerempung enggau gerempung bukai, tu mega ulih nyadi pelasar dikena besilih penemu ti ulih pulaika pemaik ngagai komuniti.
“Ketuai komuniti megai tanggungpengawa ti besai ke udah dilempaika nembiak redak ke udah milih sida. Berindik ari nya, sida patut nemu ngiga chara ti engkeman dikena ngemansangka komuniti.
“Nengah gerempung ke udah ditumbuh, kita patut ngelangkar mayuh macham aktiviti ti ulih pulaika pemaik ukai semina ngagai gerempung kita, tang mega ngagai komuniti,” ku iya madah nyemetak rambau Pengerami Nutup Aum Ketuai Komuniti N.31 Bukit Begunan, bedau lama ti udah.
Beserimbai enggau nya, ejensi perintah ti bekaul baka Opis Pelilih, Opis Residen, Opis Adat tauka Opis Betanam Betupi ulih ngatur licha bekaul pengawa ti digaga sida enggau komuniti nengah gerempung ke udah
Ketuai komuniti megai tanggungpengawa ti besai ke udah dilempaika nembiak redak ke udah milih sida. Berindik ari nya, sida patut nemu ngiga chara ti engkeman dikena ngemansangka komuniti. Datuk Mong Dagang ADUN Bukit Begunan
bisi ditumbuh.
“Nengah gerempung ti udah ditumbuh, kita (ketuai komuniti) ulih mega bekerejasama enggau ejensi perintah ke bekaul baka Opis Pelilih, Opis Residen, Opis Adat sereta Opis Betanam Betupi ngatur licha ungkup nembiak redak kita.
“Nengah licha tu, sida deka teulihka penemu baru, chunto nya dalam pengawa betanam betupi, nyangka ulih nyaup bala nembiak redak kita nambahka penatai pemisi,” ku iya.
Ba kenang ke bukai, Mong mega ngelalau ngagai tetiap ketuai komuniti kelebih agi dalam sitak dipegai iya ngambika bela meri sukung ngagai Projek Transformasyen Menua Pesisir (RTP) ke udah diagihka ngagai tetiap sitak.
“Kita udah dilempaika seiti tanggungpengawa ti besai iya nya nentuka pejalai RTP nadai napi sebarang penanggul ngambika projek ti dipejalai nya tembu nitihka langkar ke udah ditetapka.
“Kitai patut nemu, RTP tu iya nya dikena ngemansangka menua pesisir ke randaka perengkaguna pemun sereta infrastruktur ti sebaka enggau di mengeri,” ku iya nandu.
Ba kenang ke bukai, Mong mega minta semua ketuai komuniti kelebih agi bala tuai rumah ngambika nyikap diri enggau penemu, lalu enda ngelengkaka sekula ti besemak enggau genturung pendiau sida. Ketegal sekula tu iya nya palan pemun ngulihka penemu ngagai bala anak ti deka nyadi pemesai ke megai menua dudi hari ila.
Entara ke bisi datai rambau pengawa nya Kunsilor Riji, Kunsilor Menjang Niah, Kunsilor Noria, Kunsilor Gilbert Melina, Kunsilor Atal Dennis, Tr Slimen Kring, Penghulu Belie Blasan sereta ketuai komuniti ke bukai.