Hari Pengerai Ngeli ke diatur ba Rumah Philip mujur
MARUDI: Pemesai Pelilih Marudi, D.O.Mackos Sibong meri puji enggau terima kasih ngagai Unit Pengerai Ngeli ti diketuaika Dr. Puspa Rabiulali enggau bala staf laban udah ngatur program ti chukup manah iya nya program Hari Pengerai Ngeli di Rumah Philip Dagang, Sg Sebatang, semak ditu, bedau lama.
Ku iya, program tu nampung program meri penerang pasal pengerai ngeli ti pulaika pemanah pengerai kelimpah meri penyedar pemesai guna nyaga pengerai mulut, meri peransang pengerai nengah mulut sereta ngajar komuniti ke alai pengawa nagang manah agi ari ke ngubat.
“Program tu sebaka enggau pengawa perintah ngangkatka tikas pemanah pengerai rayat nengah kaul ke besai agi begulai enggau komuniti ba program pengerai mensia mayuh,”ku iya madah.
D. O. Mackos mansutka jaku tu lebuh macha jaku ari Sapit Speaker Aum Kunsil Nengeri ( DUN) ke lalu nyadi Kaban Kunsil Nengeri (ADUN) Mulu, Dato Gerawat Gala rambau nya.
Ku Mackos, Dato Gerawat Gala udah ngemendarka geran penyampau RM1,5000 ungkup Unit Ngeli ke udah nyadi pengatur program lalu geran Projek Mit Pemansang Menua Pesisir ( MRP) RM3,500 ngagai Komiti Pemansang enggau Pengelikun Genturung Pendiau (JKKK) Rumah Philip rambau atur program nya.
Mayuh bengkah aktiviti udah diatur baka pekit nyura ungkup nembiak sekula, aerobik, pengawa mandangka video aktiviti Unit Pengerai Ngeli, licha pasal ngeli, nyaut tanya, nunjukka chara merus ngeli ti betul sereta pengawa mandangka pekara bekaul enggau ngeli.
“Meri pengaga ati ngagai Dato Gerawat Gala ti udah gerah jari mantu sereta nyukung pemujur atur program tu,” ku iya.
Ba lansa ke bukai, Pemesai Pelilih ke lalu nyadi Chairman Komuniti Sihat Perkasa Negara (KOSPEN) di renggat pelilih mega diberi awak nampung ngerembaika penerang tu ngagai bala komuniti.
“Tu nyengkaum baka ni chara nyaga pemakai, sesais, kurangka kusut runding sereta meseti beperesa pengerai dikena matau tikas pengerai diri.
“Meseti ka nyaga pengerai mulut. Enti enda, tu tau ngasuh mayuh bansa penyakit datai,” ku Mackos nambah.
Sama bisi datai Dr.Puspa Rabiulali, Tuai Rumah Philip Dagang sereta bala bukai.