Anang sanggu belajarka penemu ICT

BEKENU: Komuniti kelebih agi raban veteran ti enda nemu bekenaka komputer enda ibuh berasai malu tang patut belajar enggau diri sebilik tauka sida ti landik.

Kaban Parlimen ( MP) Sibuti, Ahmad Lai Bujang madahka raban veteran mega patut belajarka pengelandik ngena aplikasyen tauka teknologi sebaka enggau rebak ke diatu.

“Enti enda nemu ngena komputer, anang berasai malu tang patut belajar enggau diri sebilik ti landik ngambika sida enda tinggal bekenaka teknologi pemadu baru nya,” ku iya.

Ahmad Lai mansutka jaku nya rambau pengawa nyuaka komputer ngagai masjid, surau enggau gerija di sitak Sibuti, ditu, kemari.

Nitih ku iya, bala ketuai genturung pendiau, penghulu tauka chairman rumah sembiang patut belajarka penemu bekenaka komputer dikena gawa.

“Nengah pengawa bekenaka perengka guna ti disedia tu, sida ulih ngaga ripot tauka keretas kereja minta bantu perintah tauka pengawa bukai,” ku iya.

Berindik ari nya, raban veteran patut meransang diri nyingkang begulai enggau pemansang teknologi kemaya hari.

“Aku suba nadai nemu ngena telefon, tang kitai patut bisi ati belajar laban kitai deka landik enti suah ngena iya,” ku iya nerang.

Berebak enggau nya, Ahmad Lai ngarapka rayat terus begulai lalu nyukung perintah nentuka pemansang di menua sida seruran bisi dipejalai.

Kebuah pia laban perintah udah nyediaka mayuh bengkah perengka guna enggau bantu ti meri pemaik ngagai sida.

Ba lansa ke bukai, bisi 23 iku penerima datai ari masjid, surau enggau gerija bela nerima komputer, kemari.

Sama bisi datai, Pemesai Opis Pekara Khas (JASA) Miri enggau Sibuti, Lukanisman Awang Sauni, Pemancha Ali Mudin sereta Chairman SUPP Bekenu, Kaunsilor Wiiliam Thien.