Raban orang indu patut regas ba pengawa dagang
Diatu penyampau sida ti ngemeranka pengawa tu agi mimit enti dibanding enggau orang lelaki
SKRANG: Kaban Kunsil Nengeri ( ADUN) Engkilili Dr Johnical Rayong Ngipa meransang orang indu kelebih agi bala indai tunggal enggau sida ti ngintu ruang bilik ngaul diri dalam pengawa dagang.
Nitih ku iya, kaul raban indu dalam pengawa dagang agi baruh ketegal sekeda pekara baka kiruh ngintu ruang bilik, nadai puku, nadai penemu bedagang, besemekih sereta rindu agi gawa ngatika diri ngintu ruang bilik.
“Aku nadai ngembuan rikod pansik bekaul penyampau raban indu dalam pengawa dagang, kelebih agi di nengeri tu, tang aku pechaya penyampau tubuh sida endang nadai mayuh, nya alai, aku dekaka sida ngubah runding ke alai dunya dagang ukai semina ungkup sida ke lelaki aja,” ku iya.
Iya mansutka jaku tu lebuh bejaku bejadika Pengawa Ngelancharka Program ‘Infiq Sedekah Jariah’ KUIB 2017 nyerumba Program Fertigasi Cili Blok Skrang di Balai Dr Johnical Rayong Ngipa, Skim Skrang ditu, kemari.
Ku iya nambah, raban indu enda patut diau diri aja lalu semina ngandalka sida ke lelaki ngiga belanja, tang patut berani nyingkang ke mua ngaul diri ba pengawa dagang belalauka penau, pengelandik sereta logistik besemak enggau sida empu.
“Diatu mayuh awak disediaka perintah dikena meransang raban indu ngaul diri ba dunya dagang. Sekeda ari nya nengah bantu ari Amanah Ikhtiar Malaysia ( AIM), sekalika ari sukut mata duit enggau penemu dagang, ti dikearap ulih nempa mayuh agi raban indu nyadi orang dagang di Skim Skrang enggau Betong,” ku iya.
Ku iya, perintah ari baruh pegai Datuk Amar Abang Johari Tun Openg nagit peranak Sarawak bepenatai pemisi tinggai datai ba taun 2030 tauka tumu agi, enggau be- ratika awak ti disediaka ejensi bekaul chukup mayuh.
“Nya alai, nyema kita bisi tanah, perimba lalu tanam utai ti bisi mansutka asil, baka pengawa betanam betupi. Pengawa tu ulih dikereja ngena teknologi moden laban semua tu enti dikereja enggau bebendar sereta dibantu ejensi baka AIM, endang deka nempa mayuh agi orang dagang indu ditu,” ku iya.
“Aku mega bisi dipadahka piak AIM mega meri jali ngagai bala kaban iya manggai RM20,000 enggau atur bala kita meseti nyadi kaban kelab Sahabat AIM, kelimpah ngasaika rebat barang dijual nengah koperasi,” ku iya seraya nambah, naka diatu, bala kaban Kelab Sahabat AIM Pampang Betong ti mungkur Skim Skrang manggai 1,802 iku.
Ba lansa ke bukai, Menijar Wilayah AIM Nengeri Sarawak Roslan Pakon ngarapka nengah pangku pengawa bala ketuai raban bansa enggau bala kaban kelab Sahabat ulih nampung penerang bekaul enggau pangku pengawa AIM mantu nempa mayuh agi orang dagang kelimpah mai pemaik nyereta koperasi ti bisi diadaka piak sida.
“Tuju penumbuh AIM, kelab Sahabat sereta koperasi ukai dikena ngiga untung aja tang lebih agi ngagai tanggungpengawa rama mantu bala indai tunggal enggau indu bukai ngulihka belanja nitihka pengelandik enggau penau sida empu,” ku iya.
“Kami di piak AIM sedar bisi sekeda komuniti kitai rindu bedagang tang ketegal nadai puku, penemu enggau pekara bekaul bantu baka ari AIM ngasuh sida pengawa tejanggal,” ku iya.
“Anang irau, kami deka mantu ari sukut puku, lalu tu patut dibayar baru nitihka pengulih sida ti nyali,” ku iya seraya nambah AIM Pampang Betong mujur bulih penuduk ketiga pemadu manah ba pengawa mayar baru duit jali.
Berebak enggau nya, AIM Pampang Betong mega bisi nyuaka bantu CSR ngagai 21 iku penerima datai ari raban orang kurang penatai pemisi, penerima bantu pengasih kelab Sahabat ti ngaul penusah pemati (16) seraya 190 pesereta ari Blok Skrang nerima setipikit kus Fertigasi Cili.
Dulu agi ari nya, Dr Rayong bisi ngemendarka geran MRP penyampau RM3,000 ngagai kelab Sahabat AIM Pampang Betong nyadika belanja kena ngatur aktiviti sida.
Sama bisi datai ngulu program tu Menijar Pampang AIM Betong Zaliha Abu Bakar, Direktor Eksekutif AIM Zamarul Kipli, Chairman Kelab Usahanita Ikthiar Betong Jerinah Arshad, Sekretari Kelab Usahanita Ikthiar Betong Nancy Rangkong, Penghulu Betuk Tubi, kaunselor, bala tuai rumah sereta pesereta Fertigasi Cili dari Skim Skrang.
Diatu mayuh awak disediaka perintah dikena meransang raban indu ngaul diri ba dunya dagang. Sekeda ari nya nengah bantu ari Amanah Ikhtiar Malaysia (AIM), sekalika ari sukut mata duit enggau penemu dagang, ti dikearap ulih nempa mayuh agi raban indu nyadi orang dagang di Skim Skrang enggau Betong. Dr Johnical Rayong Ngipa ADUN Engkilili