Hari Orang Indu Renggat Nengeri deka diatur ba BCCK kena 26 Ogos

KUCHING: Hari Orang Indu Renggat Nengeri 2017 ti deka diatur kena 26 Ogos tu ba Palan Aum Borneo Kuching (BCCK) dipelaba deka dipenyadika Kepala Menteri Datuk Amar Abang Johari Tun Openg betuju dikena meri basa ngagai orang indu ke mayuh udah nyaup ngemansangka menua tu nengah pengelandik lumba enggau main sida.

Hari Orang Indu Renggat Mena 2017 nya, ti dipelabaka deka digulu urung 5,000 mensia berambaika jaku ‘Sarawak Women in Sports,Their Achievements the Nation Pride’ lalu mensia mayuh mega dilalau ngena gari lumba enggau main tauka korporat.

Entara aktiviti bisi diatur berebak enggau nya, ‘Flash mob’, ‘Persembahan Khas’, bejadika bup ‘ Sarawak Women in Sports’ sereta atur pengawa meri gelar ngagai tuai pemesai orang indu sereta gerempung ukai dikuasa Perintah (NGO).

Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit, Datuk Fatimah Abdullah mega bisi madahka, pengawa sehari nya mega deka mantaika pengawa pemandang, urung 70 buah bansal setipak enggau jaku rambai ke udah dipilih.

“Kelimpah nya bisi lima iti gelar deka diberi, nyengkaum ke pengabis be- sai iya nya Gelar Datuk Patinggi Laila Taib, lalu ditangkan enggau Gelar Kepala Menteri (ke sida ke tebilang enggau pengawa rama), gelar Kepala Menteri (Ketuai), Gerempung Indu ke pengabis mujur sereta Gelar Kepala Menteri (Pengulih Khas kelebih agi dalam pengawa Lumba enggau Main),” ku Fatimah.

IYa madah munyi nya lebuh bejaku bejadika atur pengawa ‘High Tea for the Book Personality ‘Sarawak Women in sports’ beserimbai enggau Hari Orang Indu Renggat Perintah Menua 2017, di sebengkah hotel ditu, kemari.

Iya madahka penerima gelar nya deka nerima trofi, chek, setipikit sereta bun- gai.

“Gelar ke pengabis besai deka dipadah ba atur pengawa nya ila (26 Ogos 2017). Kami di opis menteri tu, Opis Orang Indu enggau Ruang Bilik Sarawak, enggau Opis Kunsil Orang Indu enggau Ruang Bilik (Majlis Wanita dan Keluarga Sarawak) berasai temegah ati ulih ngatur atur pengawa tu,” ku iya.

Ba pengawa nya kemari, urung 23 ari 42 personaliti orang Lumba enggau Main ( ari sida ke kelia enggau kediatu) bisi enggau ngulu atur pengawa nya.

Naka kediatu, beserimbai enggau Hari Orang Indu ke udah digaga dalam kandang berapa taun tu ke udah, kala nyelak 7 buah bup bekait enggau orang indu, iya nya ‘Sarawak Women Treading the Path of Post-Independence Years’ (2010), ‘Sarawak Women in Politics ‘ (2012), ‘Sarawak Women in Business’ (2013), ‘Sarawak Women in Volunteerism’ (2014), ‘The Pioneers:Sarawak Women in Politics’’ (2015), ‘Sarawak Women in the Arts’ (2015), ‘Sarawak Women in Education’ (2016).

Fatimah nandu baru madahka dalam bup ke sekalitu, ‘Sarawak Women in Sports’ ….their Achievements, Nation’s Pride’ deka mantaika 42 iku orang indu ke bepengelandik dalam lumba enggau main ari dulu kelia datai ngagai seharitu, lalu bup tu ila deka diberi ngagai tiap iku sida tu, pen- gudah dipenyadika Kepala Menteri.

“Pemujur kita datai ngagai peninggi langit,tauka besai agi ari nya, ke ngasuh kami temegah ati.

“Bup tu mega deka nyadi reta pesaka, ulih dikena rebak baru tauka bala nembiak diatu, lalu bup tu tetap mengkang ditu ulih dipeda mensia mayuh datai ke jemah ila,” ku iya.

Ke raban atlet ari taun 50an, 60an ku iya, jeman nya sigi mayuh bida dibanding enggau atlet kemaya hari tu, tang atlet dalam jeman tu, diperansang enggau pengetan sida iya.

“Menang pan atlet dalam jeman nya, penyampau insentif ke diterima sida iya mimit tauka nadai sekali, tang sida iya agi majakka pengerindu pegawa sida iya nyadi atlet, pengerindu sida iya ba lumba enggau main, sereta ngangkatka nama menua tu.

“Nya alai, kitai mega beterima kasih ngagai orang ke ngelatih sida. Enti nadai sukung ari orang ke berat bansa tu, atlet kitai pan enda ulih mujur, lalu sukung ke tegut bansa tu mega, patut diberi terima kasih ngagai ruang bilik sida atlet tu, ke seruran nyukung sida iya,” ku iya.

Sama bisi datai, Menteri Muda Orang Indu, Ruang Bilik enggau Pemansang Anak Mit, Rosey Yunus, enggau Direktor Opis Orang Indu enggau Ruang Bilik Sarawak, Noriah Ahmad.