Tanggungpengawa raban polis nyaga pengelikun patut disaup semua piak
KUCHING: Raban polis seruran bejalaika tanggungpengawa sida dalam nentuka pengelikun komuniti lalu pengawa tu patut disaup semua piak.
Tanggungpengawa nyaga pengelikun ukai semina dilempai ngagai polis aja tang patut disaup ketuaiketuai komuniti, ketuai opis, Kaban Kunsil Nengeri (ADUN), Kaban Parlimen (MP), ke sereta ke bukai.
“Enti semua kitai bela bejalaika tanggungpengawa diri, kita deka diau likun.
“Tang sebedau kitai bejalaika pengawa sereta tanggung pengawa nya, kitai pan deka nemu bakani ku gaya pengawa sereta tanggung pengawa kitai dalam komuniti.
“Baka PDRM, ketuaiketua komuniti, ketuai opis, enti pengawa sereta tanggungpengawa tu enda digaga enggau manah tauka enda nyapai KPI, tentu atur deka diambi ba orang ke patut bejalaikan tanggung pengawa nya, enda pia?
“Nya alai, bakani ku gaya tanggung pengawa komuniti lalu sapa ke deka madah ngagai komuniti enti tanggungpengawa nya enda dipejalai,” ku tanya Fzzruddin.
Iya madah munyi nya lebuh mungkal Randau Program Polis Komuniti ke diatur Indu Opis PDRM Pampang Padawan, Begulai enggau KRT Taman Dahlia enggau Taman Seri Makmur di Taman Dahlia ditu, kemari.
Nya alai, iya madah komuniti patut nemu tanggungpengawa diri lalu lebuh kitai ngarapka PDRM, kitai pan patut sedia bejalaika tanggungpengawa diri mantu PDRM, ngambika kitai ngembuan seiti tim ke tegap, ku iya.
“Enti kitai deka nemu kebendar tanggungpengawa nya patut bepun ba kitai empu, baik nya ari pemeresi, pengelikun sereta pekara bukai.
“Dikena beratika kitai ulih nyapai pengelantang tu, mayuh pengawa ulih digaga kitai, iya nya bepanggai ba kitai empu lalu ni naka tanggungpengawa kita nya bepanggai ba dalam seiti eko-sistem ke besai,” ku iya.
Sebedau nya Sapit Ketuai Polis Padawan, DSP Merbin Anak Lisa madahka tu pemungkal iya piak polis Padawan ngaga kerejasama enggau komuniti Taman Dahlia sereta genturung pendiau ke besemak enggau endur nya.
“Kami nerima mayuh timbal sereta pemadah ke deka diambi atur sereta digaga kami. Nya kebuah kami ‘turun padang’ ditu lalu beratika timbal ari kita,” ku Merbin.
Iya madahka Kepala Polis Sarawak Dato Amir Awal minta semua Ketuai Polis Pelilih Menua (KPD) seruran ngaul sereta betemu enggau komuniti, meda kediri empu nyema komuniti bisi napi sebarang penanggul lalu beratika ni bagi pengawa ke ulih digaga manah agi.
Ba atur pengawa nya, bisi sekeda komunti dia mantaika penemu sida iya dalam sesi randau enggau polis, alai seiku ketuai komuniti madahka ari sukut pengelikun di rumah ku iya, komuniti dia meh ke nyado ‘polis’.
“Anang semina ngarapka polis aja mantu kitai, kitai pan patut ngubah runding kitai. Tu ke seruran nyadi penanggul komuniti kitai, laban semua penanggul nya diserah ngagai polis.
“Nya alai, ngarapka kitai ulih ngubah runding kitai bansa nya, meri kerejasama ngagai polis, laban nya tanggung pengawa kitai sama-sama, sereta ngelempungka agi pengawa polis,” ku orang nya.
Ba randau nya mega, seiku ketuai mega madahka penanggul di Taman Dahlia seruran nyadi endur nembiak bejual sereta ngambi dadah, sereta mayuh kes enchuri sereta pechah rumah.
“Enti malam, bala nembiak begempuru ba padang bemain dia, enti naka pukul 10 malam kini, nyangka ulih kami enda penduli, tu datai ngagai dini hari sida iya inggar enda berundingka orang tinduk maya nya. Lalu baka nya mega, pengawa bechurika motosikal suah endar nyadi ditu.
“Nya alai, kami minta tulung polis kiti, pematau ba Tamah Dahlia ditu ari pukul 12 malam. Lalu nambah enggau nya, bala orang bukai ke kitu (orang luar) pan selalu dipeda, ngiga ‘kantau’ nyual ‘ batu (sebansa dadah) ngena kerita ke seruran betukar laban enggai ke ditemu orang.
“Kami minta polis beratika endur tu kelebih agi dalam kandang tengah malam, laban pengawa bansa tu nyadi maya tengah malam,” ku iya.
Ba tanya komuniti tu, disaut Merbin, alai ku iya, pengelikun diri empu sereta reta, patut bepun ari kitai empu.
“Pengelikun bansa tu bepun ari rumah diri empu, bakani ku kitai deka nagang pengawa salah nya nyadi, reti nya, kitai ngurangka penanggul nya nyadi.
“Ambika chunto, bisi sekeda kes pintu rumah enda bekunchi, enda di ‘lock’, bisi pagar pan manah endar gamal, tang enda dikunchi, muntang diputung bala penchuri. Pasang perengka guna ke tegap agi ngambika rumah enda muntang dipasuk orang.
“Baka nya mega enggau mutosikal, laban ulah kitai ngumbai ngelawa bakih kitai sekejap aja, tinggal dulu meh kunchi moto nya agi lekat dia. Tang udah nya, lebuh kitai nurun ke baruh nemu motosikal udah lenyau. Pengawa salah orang enchuri, orang ngerumpak enda ngira jam, enda ngira sekejap tauka enda.
Penchuri tu nganti maya, nganti peluang,” ku iya, ke muji pengawa komuniti Taman Dahlia ngaga randau nya, laban mujur ngulihka pemadah sereta timbal. SONG: Perintah besai udah ngungkupka RM55 juta dikena bejadika Projek Mit Menua Pesisir (MRP) di Pelilih Song kenyau ari taun 2011 nyentuk taun tu.
Sapit Menteri Pemansang Menua Pesisir enggau Kandang Menua (KKLW) Datuk Alexander Nanta Linggi madah, penyampau nya mayuh ari pelilih bukai di nengeri tu.
Ku iya, tu enda nyengkaum projek bukai baka karan, jalai alun tauka RISDA ti bekenaka mayuh agi belanja.
“Tu semina projek mit baka projek jalai semin ti udah digaga,” pia ku iya madah.
Iya mantaika jaku nya maya bejadi Program Kasihi Pekebun RISDA Bahagian Sibu 2017 ba Rumah Cecelia Bunsu, Nanga Kebiau, Song, ensana.
Kaban Parlimen Kapit tu mega madah, pengeransing perintah ngangkatka pengidup rayat lebih agi di menua pesisir dibantai nengah chara numbuhka projek pemansang.
Tang ku iya, pengeransing nya baka ke dikeenggai piak bukai baka sida penyakal.
“Penyakal lebih agi ngemeratka pengelikun politik sida nyengkaum enda madahka pengamat ke betul.
“Aku enda mayuh kedalih laban kita rayat patut nemu nama utai ke amat,” ku iya madah baru.
Berindik ari nya, Nanta maya tu ngarapka rayat lebih agi bala nembiak enggau tuai raban bansa enti enda terang sentang projek pemansang tentuka amat-amat.
“Aku nemu diatu kitai di rumah panjai mayuh ngembuan pelajar.
“Nya alai giga penerang ke betul, anang sepeneka ati ninga jaku orang lalu nampung pekara ke enda betul,” pia ku iya.