Perintah S’wak neruska pengawa mansik kampung
TPA patut ditambah ngagai 200,000 hektar dikena nentuka rampa menua di nengeri tu terus dijaga
MIRI: Perintah Sarawak deka terus bejalaika pansik nyengkaum pansik ari sukut sainstifik di kampung asal ba serata nengeri dikena ngenukuka kandang menua ti patut ditaga ngambika enda kena sebarang pengawa pemansang nyengkaum aktiviti ekonomi.
Menteri Muda Perambu Mengeri, Pengatur Tanah enggau Rampa Menua Datu Len Talif Salleh madahka Sarawak agi patut nambah abis nadai 200,000 hektar agi, kandang kampung ngambika ditaga nyadi ‘Kawasan Terlindung Sepenuhnya’ (TPA).
“Kitai nagit 1 juta hektar kandang kampung asal ti diintu (TPA) dikena nyaga enggau ngintu rampa menua asal, utai tumbuh enggau utai idup sereta daya idup komuniti besemak,” ku iya seraya nambah, pekara nya mega beguna ungkup pengidup rebak dudi, ngambika sida mega bela ulih ngasaika pemaik iya.
“Diatu, kitai udah naga 800,000 hektar pemesai kandang kampung asal tu nyadi TPA lalu kitai agi kurang 200,000 hektar agi,” ku iya lebuhka bejaku bejadika
Kitai nagit 1 juta hektar kandang kampung asal ti diintu ( TPA) dikena nyaga enggau ngintu rampa menua asal, utai tumbuh enggau utai idup sereta daya idup komuniti besemak. Datu Len Talif Salleh Menteri Muda Perambu Mengeri, Pengatur Tanah enggau Rampa Menua
pengawa ngemun Ekspedisi Saintifik Tama Abu 2017, di sebuah hotel tebilang ditu, malam kemari.
Iya ti ngarika Sapit Kepala Menteri ke lalu nyadi Menteri Pemansang Mengeri Enggau Pengeraja Asal Kedua Datuk Amar Awang Tengah Ali Hasan. Sama bisi datai Sapit Speaker DUN, Datuk Gerawat Gala, Kaban Kunsil Nengeri ( ADUN) Telang Usan Dennis Ngau sereta ketuai ekspedisyen, Datuk Prof. Emeritus Dr Mohamed Abdul Majid.
Nya alai, Len merambu ngambika Opis Kampung Sarawak (JHS) enggau piak pemansik bejalaika pengawa mansik dua kali setaun ari sekali setaun, nentuka mayuh agi pengawa ulih dipejalai lalu pekara ti ditemu ulih dirikot dikena ngintu pemansut asal enggau rampa asal nya.
Ngelansa pasal penatai bala Gerempung Ukai Dikuasa Perintah (NGO) menua luar ngagai nengeri tu ngulihka penerang tauka bejalaika pansik, ku Len, Perintah Nengeri nadai napi penanggul bekunsika penerang, nyema sida datai nengah chara enggau atur ti betul.
Tang pekara ti ngasuh kitai asa laban bisi sekeda NGO tu tama belalai ngagai nengeri tu lalu enda nengah atur pengawa ti betul ngulihka penerang sereta bejalaika pansik sida, lalu tu tau meri penerang enda betul ngagai pengawa dipejalaika perintah sereta penerang ti diulih enda diakun.
“Nyema kitai datai ari pintu penama ngulihka penerang, kitai endang ngelaluka penatai sida lalu kitai nadai penanggul bekerejasama. Ukai nya belalai tama kitu ngulihka penerang,” ku iya nyemetak.
Ba lansa ke bukai, Ekspedisyen Saintifik Tama Abu 2017 nyadi pengawa kelima dipejalaika JHS begulai enggau raban bepengelandik enggau pemansik ari dalam enggau luar menua, ari baruh program Kandang Tengah Menua Borneo (HoB) Sarawak.
Direktor Kampung Sarawak, Sapuan Ahmad madahka ungkup ekspedisi Tama Abu taun tu, bisi 93 iku sainstis enggau orang ti landik nyereta iya, datai ari mayuh bengkah institut perintah, universiti enggau NGO ari serata menua, kelimpah ari United Kingdom (UK), Australia, China, Denmark sereta menua Brunei Darussalam.
Nitih ku Sapuan, batang tuju Ekspedisyen Saintifik Tama Abu 2017 dikena ngenukuka pemisi ‘ badak sumbu’ enggau ‘ temadau’ tauka badak siga ti diripot bisi di sekeda endur ti mar ditemu di kandang bukit Tama Abu nya.
“Kelimpah ari nya, ungkup pengawa dokumentasyen bemacham bansa jelu siga, utai idup enggau utai tumbuh ti baru ditemu, beratika peminta dudi hari ba pengawa ngintu di HoB tu,” ku iya nerang.