Enam iku polis ti ngereja penyalah mejal ke udah dilepas, ditan baru

KUCHING: Enam iku polis di Sarawak ke ditangkap ketegal penyalah mejal kena 9 Ogos tu tadi, udah dilepas enggau jamin kemari.

Taja pia, raban polis tu, seiku ari sida nya bepangkat inspektor enggau lima iku agi, udah nya ditangkap baru bepelasarka kes ke bisi diripot ba Balai Polis Sekama.

Ketuai Opis Nasat Pengawa Salah Sarawak, Datuk Dev Kumar madah kes keterubah sida dikena tangkap kena 9 Ogos nya bepelasarka kes ke bisi diripot ba Balai Polis Batu Kawah, lalu sida nya ditangkap baru (taja pan udah lepas sereta dijamin) bepelasarka kes ke diripot di Balai Polis Sekama.

 Kes ba Sekama tu, ke enam-enam sida tu udah dibai ngagai kort pagi tu (pagi kemari) minta sida enam iku tu ditan baru nengah riman ke dipinta ba kort pagi tu.

Kami agi nganti pemutus kort sentang peminta kami bekait enggau sida enam iku tu ke ditangkap baru. Kami nerima tiga iti ripot, iya nya ari Balai polis Sematan, Batu Kawah enggau Sekama. Sebedau tu, ke ripot ari Batu Kawah, ke enam-enam sida tu diriman lima hari, lalu ke sehari tu minta ngagai kort sida iya di reman baru,” ku Dev.

Iya madah munyi nya pengudah baum enggau ketuai pampang opis di IPK beserimbai enggau penemuai keterubah Amer ngagai IPK pengudah mangku pengawa nyadi Kepala Polis Sarawak nganti Datuk Mazlan Mansor ke bepindah nyadi Kepala Polis Selangor pun bulan Julai tu tadi.

Ba atur pengawa nya kemari, Amer mega ngelancharka polis bebasikal IPD ke deka nyaga pengelikun palan dagang temuai di mengeri Kuching berengkah ari kemari, ke lai polis ke nyaga palan tu ngena ensikal, kelimpah ari Unit Matau Ngena Mutosikal ( URB) enggau kerita pematau polis.

Semua ripot nya digaga tiga iku orang bukai ke ngeripot sida enam tu.

Hari Empat minggu siti nyin tadi, Kepala Polis Sarawak, Dato Amer Awal madah polis Sarawak enda berkrompomi enggau pegawai tauka raban ke ditemu ngereja pengawa salah, ke tau ngamahka nama manah Polis Diraja Malaysia (PDRM).

Sida enam iku ke ditangkap tu didawa mejal minta sepenyampau duit ari dua iku orang dagang, pun bulan tu tadi. Keenam-enam suspek ditangkap raban polis ari Unit D9 Indu Opis Pelilih Menua Kuching (IPK) Sarawak di rumah sereta endur gawa polis tu, ditu, Padawan enggau Lundu minggu siti nyin tadi.

Saspek ke bepangkat inspektor nya gawa di Pampang Lisin Opis Pengurusan IPK Sarawak, lalu lima iku sida bukai bepangkat mit gawa di pampang palan polis ke enda sebaka di IPD Kuching.

Kes nya ditasat nengah Seksyen 384 Kanun Keseksaan, alai enti sida iya ditemu salah, tau kena ukum jil pengabis lama 10 taun tauka ukum mata duit tauka disipat tauka barang bagi dua ari ukum nya.

Sama bisi enggau ngulu aum media nya kemari, Ketuai IPD Kuching, ACP Abang Ahmad Abang Julai, enggau Ketuai Opis Nasat Pengawa Salah enggau Pengelikun Komuniti, SAC Shafie Ismail.