Peranak di Krapa Spak udah ngulu ‘Program Fire Point’
BETONG: Urung 200 iku peranak genturung pendiau ba kandang menua Krapa Spak, Betong udah datai ngulu ‘Program Fire Point’ ke diatur Opis Bomba enggau Penyelamat Malaysia (JBPM) Betong.
Program nya digaga bepalan ba Rumah Jimbai, Krapa Spak ditu bedau lama.
Sida ke bisi datai ngulu program nya udah diberi licha pengelikun nyeliah penusah angus ke diberi Pemesai Bomba Kanan (PBK) I Henry Jugah lalu demonstrasyen udah diembing PB Abdul Kadir Sebie enggau PB Edward Baka.
Program nya udah dipenyadi Kaban Kunsil Nengeri (ADUN) Layar Gerald Rentap Jabu.
Ba jaku iya, Rentap udah meri puji ngagai pengawa BBP Betong laban udah bejalaika tanggungpengawa ti engkeman iya nya meri pemadah tauka penerang ngagai peranak ti diau di kandang menua pesisir bekaul pengelikun nyeliah penusah angus.
Ku iya nampung, taja pejalai ngelawa rumah pan- jai nya urung sejam ti ngena entukar 4x4, tang sida tetap ransing deka mantu rayat di kandang menua pesisir.
Nambah ke nya, tu entara program ti keterubah digaga di rumah panjai ba sitak nya.
Rentap mega ngarapka sida BBP Betong deka terus mantu peranak di kandang menua pesisir lalu terus meri penyedar bekaul pengelikun rumah panjai ari dituntung penusah angus.
Ba pengerami nya, iya mega udah meri geran sepenyampau RM10,000 dikena bebelika perengka enggau madamka api di rumah panjai nya.
Sama bisi datai iya nya Sekretari Politik Kepala Menteri Dr Richard Rapu, Pemesai Pelilih Betong Khalid Andong, Pemesai Pengerai Bagi Menua Miri, Pemesai Opis Pekara Khas (JASA) Betong, bala penghulu, bala kunsilor sereta tuai rumah di kandang menua Krapa.