Ukai semina bantu uniform sekula aja, perintah mega udah nyediaka agih belanja besai nentuka pekara pengelantang pelajar seruran bisi ungkup bala nembiak, nyengkaum perengka guna infrastruktur, bantu sekulaship, Voucher 1Malaysia enggau ke bukai.

Menteri Dagang Antarabansa enggau E-Dagang ke mega Menteri Wang Kedua Dato Sri Wong Soon Koh madahka kenyau ari taun 2000, Yayasan Sarawak udah dilempaika tanggungpengawa ari perintah nengeri bejalaika pengawa ngagihka uniform sekula nyengkaum kasut enggau beg ngagai bala nembiak di serata Sarawak.

“Ukai semina bantu uniform sekula aja, perintah mega udah nyediaka agih belanja besai nentuka pekara pengelantang pelajar seruran bisi ungkup bala nembiak, nyengkaum perengka guna infrastruktur, bantu sekulaship, Voucher 1Malaysia enggau ke bukai.

“Berengkah ari taun 2017, uaka Bantu Uniform Sekula Taun 2017 di balai Sekula Primari (SK) Agama Sibu ditu, bedau lama.

Sama bisi datai Direktor Yayasan Sarawak Azmi Bujang, Pemesai Pelilih Sibu Awang Yusup Awang Mostapha, Pemesai Pelajar Pelilih Sibu Wong Chong Kung sereta Temenggung Stanley Geramong.

Berebak enggau program nya, bisi 150 iku nembiak datai ari tiga buah sekula sekondari, tujuh buah sekula primari lalu 11 buah sekula primari bansa China di sitak Kunsil Nengeri (DUN) Bawang Assan udah nerima Voucher Uniform Sekula Yayasan Sarawak ti udah disuaka Wong.

Kelimpah ari nya, Wong ke mega Kaban Kunsil Nengeri ( ADUN) Bawang Assan ngarapka bala nembiak ulih nguasa Jaku English lalu belajarka penemu digital baka ti dikemeratka kepala menteri Sarawak diatu.

Ku iya, dunya digital enggau Jaku English ulih mai komuniti kelebih agi bala nembiak ngagai ‘New Ways of Doing Things’ enggau bekenaka teknologi pemadu baru.

“Nya alai, Opis Menteri Pelajar, Sains enggau Pemansik Teknologi ari baruh pegai Dato Sri Michael Manyin Jawong ngansak sebuah sekula di tetiap DUN di nengeri tu ngulu program Sekula Primari Iru Jaku English sekalika di sekula nya empu tauka di luar sekula.

“Kebuah pia, Jaku English nyadi batang jaku dunya, nyema kitai deka ngereja sekeda pengawa ke baru, chara baru nengah digital, kitai meseti nguasa Jaku English,” ku iya.

Ba lansa ke bukai, dalam jaku dipansutka Azmi, iya madah dulu suba perintah nengeri semina ngagihka RM2 juta aja setaun ngagai Yayasan Sarawak ngambi ngagihka bantu pekayan sekula beungkus RM100 ngagai 20,000 iku nembiak di serata nengeri.

Ku iya, bisi sebana ari sekeda piak madahka bantu RM100 enda chukup kelebih agi di menua pesisir.

“Nya alai, Yayasan Sarawak udah merambu ngagai perintah nengeri ngambika belanja tu ditambah ngagai RM200 ungkup seiku nembiak, tang nyema penyampau tu ditiki, kitai deka ngurangka penyampau tubuh penerima ngagai 10,000 iku nembiak aja.

“Tang perintah nengeri beratika penyampau tubuh 20,000 iku ti enda patut dikurang, nya alai agih belanja ditiki ari RM2 juta ngagai RM4 juta setaun berengkah ari taun tu,” ku iya.

Program ke sama mega deka diatur sehari tu, 15 Ogos, di Sekula Primari Bansa China (SJK) Thai Kwang Sibu lalu deka dipenyadi ADUN Dudong Datuk Tiong Thai King.