DTTG mujur numbuhka pampang gerempung di Miri
SIBU: Dayak Think-Tank Group (DTTG) diatu udah ngerembaika pampang gerempung sida ngagai Miri, ti baru ditumbuhka, kena hari Enam tu tadi.
Pengerami numbuhka DTTG Pampang Miri tu dipenyadi Kaban Parlimen Miri Dr Micheal Teo Yu Keng kelimpah bela digulu Penyanding Penemu UndangUndang DTTG Pampang Miri enggau Bintulu iya nya Harrison Ngau enggau Abun Sui Anyit.
Maya tu, bala mayuh besetujuka Elias Lipi Mat nyadi chairman lalu Philip Asry nyadi sapit iya.
Pengawa sekretari dipegai Patricia Davies, Donny Don nyadi tukang wang disaup Wellson Agan lalu Rockey Gasan dipilih nyadi ketuai Biro Kebajikan enggau Bangga Kedit nyadi ketuai komiti ti saup Awell Mujah.
DTTG ditumbuhka bulan Januari 2015 ti betuaika Willie Henry Majang alai gerempung tu dikena ngempung penemu mayuh, runding enggau kira sentang pengidup bansa Dayak baikka ba pe- natai pemisi nyengkaum ba pengawa politik.
DTTG nyadika platforam bala intelektual enggau profesional Dayak berandauka isu rama, beratika tikas pengidup Dayak ba pelajar sereta main asal sebedau dibantai ba media ngambika matak runding piak ti bekaul.
Ketegal ti ngemeratka pekara modal mensia, DTTG besaup enggau pangan diri nyengkaum bala raban ari Semenanjung Malaysia tauka ba menua tasik suah sereta enda kakang ati nyuaka bantu baka bantu pelajar ngagai nembiak bansa Dayak enggau ngatur porgram bantu raban (CSR), ti endang seiti ari tuju penumbuh gerempung tu.
Bepun ari nya, DTTG majak ngerembai alai sebedau tu mega pampang keterubah sida ditumbuhka di Bintulu bulan Februari tu tadi lalu ditangkan Pampang Kuching-Kota Samarahan ba bulan April.
Kelimpah ari nya, pampang sida di Betong bela udah ditumbuhka lalu ba ditu sida andal ke pegai raban indu nyadi chairperson DTTG Pampang Betong.