Opis Kaunsil Kanowit nyikap diri napi penusah ampuh bah
KANOWIT: Opis Kaunsil Pelilih Menua Kanowit naka ke diatu ba tikas ngatur pengawa matau penusah ampuh bah ba pelilih nya bepun ari hari ke suah ujan maya tu.
Pemesai opis nya Katis Noel Nyabong madah, ketegal tu, nyengkaum disekula semua piak dipinta bejejaga bela ngintu pengelikun diri dikena napi penusah ambuh bah ngenyit nyadi.
“Piak kitai diatu semina matau aja penusah tu.
“Tang taja pan baka nya, bala apai indai meseti bekerejasama enggau piak sekula beratika pengelikun anak sida,” pia ku iya maya berandau enggau pengarang berita, kemari.
Iya mantaika pekara nya maya dipinta madahka pengawa ke diatur piak sida bepun ari Sekula Primari (SK) Nanga Balingiau, Ngemah, Kanowit ditinggang penusah ampuh bah ngenyit kena Hari Minggu tu tadi.
Nambahka jaku iya, Katis madahka penusah ke nyadi di sekula nya ketegal menua nya ke baruh lalu ai sungai ke besemak ngampuhka sekula nya laban hari ujan bangat.
Tang ku iya, ai jampat surut laban ai ba Batang Rajang empai besai.
“Sungai semak sekula nya mit lalu maya ujan bangat ai deka melumpa ngagai kandang sekula.
“Ngarapka bala Gerempung Apai Indai enggau Pengajar (PIBG) ulih ngadu pengawa beripai meresi sekula nya sepengudah ampuh bah,” ku iya madah baru.
Kepala Pengajar SK Nanga Balingiau, Jabut Minda maya dipinta nerangka penusah nya madah, penusah ke nyadi nuntung sida tu bepun hari ujan bangat lemai hari Enam.
“Ai Sungai Balingiau jampat amat besai lalu ngampuhka sekeda endur ba sekula nyengkaum ba seiti bilik kelas ke ampuh ai sekaki setengah.
“Taja pan baka nya, nembiak buding maya tu nadai di sekula,” pia ku iya sambil madah ai surut lemari hari Minggu nya mega.