Sukung projek pemansang ti dipejalaika perintah
Tetiap projek pemansang ti dipejalaika perintah nya deka meri pemaik ngagai rayat, ku Entulu
SELANGAU: Menteri Ba Opis Menteri Besai, Datuk Joseph Entulu Belaun minta saup peranak di menua pesisir nyukung projek pemansang ti dipejalaika perintah ke meri pemaik ngagai rayat.
“Baka ke ditemu kitai semua, tetiap projek pemansang ti dipejalaika perintah baka bekal elekterik, ai beresi enggau jalai alun tentu deka nujah tanah ke diempu rayat.
“Nya alai, aku ngelalau orang ke ngempu tanah nya ngambika anang nagang projek nya enti bisi nujah tanah kita.
“Ulah ke baka nya semina deka ngachau pejalai projek sereta meri empas ngagai pengelantang rayat,” ku iya.
Kaban Parlimen Selangau bejaku munyi nya ba Pengerami Ketuai Begulai enggau Rayat di Rumah Limbing, Sungai Arau, Hulu Mukah,bedau lama udah.
Sama bisi datai Sekretari peribit Kanan Menteri Ba Opis Menteri Besai, Bayang Ringkat, ex-Penghulu Balai Gara enggau p eranak menua nya ke bukai.
Berebak enggau nya, Entulu mega meransang peranak menua pesisir ngaul diri ba projek ekonomi baka betanam enggau betupi ti engkeman ba sida dikena nyungkak penatai pemisi sida.
“Pengudah mujur ngelala utai tanam enggau tupi ke engkeman dikereja, projek ekonomi deka mujur dipejalaika.
“Baka nya mega enti bisi peminta ke tinggi ba makit, nya deka meri asil ti manah sereta mantu nyungkak ekonomi,” ku iya.
Ba pengerami nya, Entulu mega bisi nyuaka chek projek mit menua pesisir (MRP) RM106,000 ngagai semilan Komiti Pemansang enggau Pengelikun Genturung Pendiau (JKKK).
Semilan JKKK iya nya JKKK Rumah Emong, Rumah Balang, Rumah Limbing, Rumah Jani, Rumah Pengarah, Rumah Sabeli, Rumah Abu, Rumah Lunchong enggau Rumah Seli.
Kelimpah ari nya, iya bisi nyuaka bantu ngagai nembiak mit nyelai pendiau enggau orang lunggar umur, kelimpah bejadika Biro Imdu JKKK Rumah Limbing.
Nya alai, aku ngelalau orang ke ngempu tanah nya ngambika anang nagang projek nya enti bisi nujah tanah kita.