Rayat menua pesisir diansak ngemansangka pengawa betanam betupi: Entulu
SELANGAU: Menteri Ba Opis Menteri Besai, Datuk Joseph Entulu Belaun ngansak rayat menua pesisir anang enggai ngemansangka pengidup sida nengah pengawa betanam betupi dikena nambahka tikas penatai pemisi diri.
“Enti kitai udah nemu nama bagi utai ke ditanam tauka nama bagi jelu ke patut ditupi, dia projek ekonomi baka tu ulih dipenyadika.
“Pia mega enti utai tanam tauka jelu kita nya nerima peminta tauka laku dijual dia kita mega ukai semina bulih penguntung ke mayuh tang bela nyaup menua tu nyungkakka penatai pemisi,” ku iya.
Iya mega madah, kerejasama rayat di menua pesisir beguna bendar dikena nentuka pemujur projek pemansang perintah ti ditumbuhka ungkup pengelantang pengidup rayat.
K a b a n P a r l i m e n Selangau, ambika banding baka penemu rayat sentang tanah sida ti bisi kena renchah projek.
“Enti nadai kerejasama ari rayat empu, projek baka karan, paip ai enggau jalai alun enda ulih nyadi nyema rayat enda meri kerejasama ngagai penumbuh projek nya.
“Pekara tu tau bendar nekul pemansang enggau pengidup rayat empu,” pia ku iya madah maya bejaku ba Pengerami Pemesai Begulai enggau Rayat ba Rumah Limbing, Sungai Ara, Ulu Mukah ditu, empai lama tu tadi.
Sama bela datai maya, tu iya nya Sekretari Peribit Kanan Menteri Ba Opis Menteri Besai, Bayang Ringkat, ex-Penghulu Balai Gara sereta mensia mayuh ke bukai.
Ba pengerami nya, Entulu bisi nyuaka chek projek mit menua pesisir (MRP) sepenyampau RM106,000 ngagai semilan buah Komiti Pengelikun Enggau Pemansang Genturung Pendiau (JKKK).
Sida tu iya nya JKKK Rumah Emong, Rumah Balang, Rumah Limbing, Rumah Jani, Rumah Pengarah, Rumah Sabeli, Rumah Abu, Rumah Lunchong enggau Rumah Seli.
Kelimpah ari nya, iya bela bisi nyuaka bantu ngagai nembiak timpang pendiau, orang tuai enggau bejadika Biro Raban Indu JKKK Rumah Limbing.