14 sampel ukui di VRI Ipoh negatif Rabies

KUCHING: Asil ujian makmal ba 15 sampel ukui di Palan Pemansik Veterinari (VRI) Ipoh, bisi 14 ari nya ngayanka pemutus negatif sereta seiti sampel ukui ditemu positif Rabies.

Opis Servis Veterinari Sarawak (JPVS) ngeripotka pemutus positif nya ke diambi ba sampel ukui ari Kampung Muara Tangga, Serian ti endang kandang endur igi penyakit nya kenyau 13 Julai tu tadi.

Nitihku Komiti Mutarka Penusah Ngenyit Nengeri (JPBN) Sarawak, bisi 414 iku ukui ba kandang menua Serian enggau Lubok Antu udah diberi vaksin, naka pukul 3 lemai, kemari.

Nya nyadika penyampau semua iya bisi 31,041 iku jelu ke dikerindu ti nyengkaum 23,399 iku ukui, 7,597 iku mayar enggau 45jelu bukai ke udah diberi vaksin.

Nitihku JPVS, naka ke diatu bisi 34,698 survelan aktif enggau 793 survelan pasif dikena nagang igi penyakit Rabies berampit di kandang menua Serian, Kuching, enggau Sri Aman.

Bisi 181 sampel ti nyengkaum sampel ukui ( 163), mayau ( 17) enggau seiti sampel kesindap ke diambi ari Bagi Menua Kuching, Sri Aman, Serian, Samarahan, Betong, Sarikei, Sibu enggau Miri udah dianjung ngagai VRI Ipoh ke diuji Direct Fluorescent Antibody Test (FAT).

Penyampau sampel positif virus Rabies, bisi 34 sampel ukui enggau enam sampel mayau.

Kelimpah ari nya, operasi bersepadu ti dipejalaika Opis Menteri Kaunsil Kandang Menua begulai enggau JPVS udah nangkap 988 iku ukui lelang di Kuching, Samarahan enggau Serian ti dikena nagang pemayuh ukui lelang, awakka ulih nyeliahka pengelekai igi penyakit nya.

Dalam penerang JPBN Sarawak, Opis Pengerai Nengeri Sarawak madahka bisi 95 kes ketup baru ditemu kemari nyengkaum 16 kes di Serian, tiga kes di Sri Aman, 75 kes di Kuching enggau seiti kes di Samarahan.

Ari penyampau nya, mungkur jelu tupi ukui (55 kes) enggau mayau (21), lalu 19 kes iya nya jelu lelang tauka ke nadai orang ngempu iya nya ukui (10), mayau (8) enggau seiku chit.