RM250j subsidi ungkup orang betanam betupi
Agih belanja tu dikena nyediaka perengkaguna pemun sereta ngaga jalai kebun di menua pesisir
BELURU: Perintah nengeri udah meri agih belanja sepenyampau RM250 juta dikena meri subsidi betanam betupi sereta perengkaguna pemun ke bukai di kandang menua pesisir ba nengeri tu, nyengkaum ngaga jalai kebun.
Sapit Kepala Menteri Datuk Amar Doughlas Uggah Embas madah, agih belanja nya deka diberi begulai ari perintah nengeri enggau perintah besai ti nyadika peransang dikena ngangkatka agi industri betanam betupi di nengeri tu seraya ulih ngangkatka tikas pengidup peranak di kandang menua pesisir.
“Perintah endang deka seruran ngiga chara enggau polisi dikena nambahka agi penatai pemisi rayat kelebih agi sida ti bumai enggau bekebun di kandang menua pesisir,” ku iya.
Iya ti madah munyi nya lebuh bejaku bejadika Program Kaul Betanam Betupi ba Balai Komuniti Beluru, ditu, kemari. Uggah keran deka meda bala orang ti betanam betupi ngena enggau naka ulih semua subsidi ti diberi
Perintah endang deka seruran ngiga chara enggau polisi dikena nambahka agi penatai pemisi rayat kelebih agi sida ti bumai enggau bekebun di kandang menua pesisir.
nyengkaum sum sereta anak pun buah ti enda ngerua agih belanja ke udah diberi.
Ba kenang ke sama, Uggah ke mega Menteri Betanam Betupi Moden, Tanah Adat enggau Pemansang Kandang Menua madah, diatu udah maya ungkup Sarawak ngubah chara bumai, iya nya ari chara lama ngagai chara moden nengah pemansang teknologi digital.
Ku iya, perintah nengeri deka nukar konsep betanam betupi di nengeri tu lalu ngena aplikasyen digital ke endang diungkup ngintu kebun di nengeri tu dikena ngemansangka sektor betanam betupi enggau ngulihka asil ti produktif.
Uggah madah iya deka ngayanka peneleba ti diulih iya maya pejalai iya ke China bedau lama iya nya belajarka chara enggau aplikasyen ke diguna ba sektor bekebun.
“Di china udah bisi teknologi ke utai ditanam sida, nengah sistem ai, meri sum enggau ke bukai ngena komputer tauka terus ari telefon binching,” ku iya.
Sentang chara ti dikena ungkup bejualka asil produk komoditi ari peranak di rumah panjai, Uggah madah opis menteri iya diatu bisi chara baru ke dikumbai Palan Ngumpul.
Ku iya nengah chara tu, pemesai Opis Betanam Betupi nengah ejensi Opis Dagang Produk Komuniti (FAMA) deka ngaga pengawa matau ngagai tetiap rumah panjai dikena nentuka produk komoditi ke bisi di sitak nya.
“FAMA deka meli semua asil komoditi nya lalu mai ngagai Palan Ngumpul. Ba palan tu semua orang ti meli (tukey) deka ngulihka asil nya.
“Nengah nya, bala orang ti betanam betupi enda ibuh irau nyema bisi mayuh asil buah ke bisi, laban endang deka mantu kita enggau meli asil nya sereta nyual baru di Palan Ngumpul ke udah ditumbuhka,” ku iya madah.
Beserimbai enggau nya, Kaban Kunsil Nengeri (ADUN) Marudi Datu Dr Penguang Manggil mega sama bisi minta ngambika Palan Ngumpul nya ditumbuhka di kededua Pasar Marudi enggau Pasar Beluru.
Ba pengerami nya, Uggah mega udah nyuaka Agih Belanja Khas Menteri Besai enggau Agih Belanja Projek Mit Menua Pesisir (MRP) lalu semua agih belanja nya sepenyampau RM473,000 ngagai 30 iku penerima iya nya ari Komiti Pemansang enggau Pengelikun Genturung Pendiau (JKKK) sereta sekeda Gerempung Ukai Dikuasa Perintah (NGO).
Sama bisi datai ba pengerami nya Menteri Muda Betanam Betupi Dr Abdul Rahman Ismail ke mega ADUN Bukit Kota sereta Direktor Betanam Betupi Sarawak Datu Lai Kui Fong.