Program nuchuk vaksin ba jelu mengkang dipejalaika JPVS
KUCHING: Program nuchuk vaksin ba jelu mengkang dipejalaika Opis Servis Veterinar Sarawak (JPVS), dikena nyeliahka penyakit tu ari majak ngelekai ngagai kandang menua bukai.
Naka pukul 3 lemai kemari, urung 227 iku ukui udah dituchuk vaksin di lapan buah genturung pendiau di Bagi Menua Serian. Penyampau kumulatif kediatu iya nya urung 31,347 jelu lalu ari penyampau tu, 23,705 (ukui), 7,597 (mayau) sereta 45 jelu bukai udah dituchuk ngena vaksin.
Nitihka ripot ti diberi Komiti Mutarka Penusah Ngenyit Sarawak, madahka Program Nuchuk Vaksin ba ukui dikena nyeliahka penyakit Rabies tu ari ngelekai ngagai endur bukai deka dipejalaika baru di bagi menua nya kena Hari Empat (17 Ogos) tu di Genturung Pendiau Danau Keranggas, Danau Keranggas Baru enggau Dana Melikin, genturung Pendiau Linsat – Batu Kudi, Ensebang Kuari, Ensebang Kuari Baru,enggau Ensebang Padang Bilun,Ensebang Plaie, Ensebang Plaie A, Ensebang Plaie B enggau Ensebang Sg. Buraak, Igom, Murud Plaman, Murud Mawang enggau Segenam, Rituh Labuan, Bedega, Seruit enggau Rituh Mawang.
Kelimpah ari nya, genturung pendiau bukai ke sama deka dilawa JPVS ny engkaum Genturung Pendiau Soh,Raeh, Bintawa Lama,Sg Barie,Sabal Kruin Baru, Sabal Apeng,Sg Kruak enggau Sg Paoh,Sg Pinang, Telagus enggau Jirok.
JPVS mega majakka pengawa nasat orang ba kes Rabies ke bisi diripot nyadi, lalu naka kediatu urung 35,203 survelan aktif enggau 806 servelan pasif, dikena nagang penyakit rabies tu ari berampit, ti dipejalaika JPVS di Serian, Kuching enggau Sri Aman.
Ku surat nya baru, urung 189 sampel ke diambi ari urung 171 sampel ukui, 17 sampel ari mayau enggau siti sampel ari semawa bisi diambi ari Bagi Menua Kuching, Sri Aman, Serian, Samarahan, Betong, Sarikei, Sibu enggau Miri udah dianjung ngagai VRI, Ipoh, ngambik diperesa.
Penyampau sampel positif virus rabies ke digaga ngena ‘Direct Fluorescent Antibody Test (FAST)’, iya nya 34 sampel ukui, 6 sampel mayau ari 172 pemutus sampel ke diterima ari VRI, Ipoh.
JPVS ngelalau mensia mayuh ke bisi ukui tauka mayau tauka jelu bukai, nganjung jelu sida tu betuchuk vaksin, lalu enti udah dituchuk jelu tupi sida tu enda dikemendarka pansut dulu kelimpah ari ngemataka ulah jelu nya.
Kelimpah ari nya, Opis Pengerai Nengeri bisi madahka urung 107 iti kes kena gigit ukui ke bisi diripot naka kediatu, 23 kes di Serian, 3 di Sri Aman, 80 di Kuching enggau siti kes di Bagi Menua Samarahan.
Ari penyampau nya, 51 kes kena gigit ukui, 34 kes (mayau) lalu semawa (siku). Lalu penyampau bukai, 21 kes kena gigit jelu ke nadai borang ngempu baka ukui (14 kes) enggau mayau (7 kes).
Semua kes kena gigit jelu ke nyadi berengkah ari 1 April 2017 nyentuk ke diatu bisi2,500 iti kes.
Opis Pengerai Sarawak ngelalau mensia mayuh ke kala kena gigit ukui dalam timpuh 1 April ny centuk ke diatu beperesa enggau lengkas ba sebarang endur palan berubat ke besemak enggau sida.
“Nyema kita bisi kena gigit ukui tauka jelu siga bukai, kita diasuh nuchi abi gigit nya ngena sabun sereta ai beresi (ai ke mayuh) dalam kandang 15 minit, lalu udah nya bai ngagai sepital tauka klinik ke pemadu semak enggau kita,” ku surat nya.