Pengawa neritka atur ba palan ngemansut ai mata nengeri amat begunaka kerejasama ari NREB

KUCHING: Opis Menteri Utiliti udah berandau sereta nempa kerejasama enggau Kaunsil Pengeraja Asal enggau Rampa Menua (NREB) sentang chara deka mutarka penanggul sungai ke nyadi pemansut ai mata ti dikategori setengah kamah di nengeri tu.

Menteri opis nya, Dato Sri Dr Stephen Rundi Utom madah kitai begunaka raban penerit adat ngenukuka kandang endur ke udah digazet nya enda dipasuk sereta endur bejalaika aktiviti.

Nitih ku iya, bisi 58 buah kandang endur nekat ai deka digazet dikena ngenukuka sungai nya ke nyadi pemansut ai mata beresi dikena tauka diirup rayat menua tu.

“Kandang endur nya ulih digazet tang kami begunaka raban penerit adat, lalu pekara ti dipadahka Opis Audit nya endang amat, kami patut begunaka kerejasama ari NREB bejalaika atur ke terit, laban nadai guna endur nya digazet enti nadai raban penerit adat tauka atur.

“Ambika chunto baka Tekat Ai Kelalong di Bintulu, kami begunaka Opis Tanah enggau Survei sereta NREB ba pengawa nentuka nadai aktiviti betanam betupi dipejalai nyentuk ngagai kandang endur ke enda tau dipasuk. Aku meda bisi orang tama nadai pemedar kia, nya alai atur ke terit ari raban penerit adat tauka atur amat beguna.

“Kami udah betemu enggau NREB, bisi berapa kali kami udah betemu laban mayuh bagi ke deka diperatika kami,” ku iya ti endang nerang silik asil ke dikerandauka enggau NREB.

Dr Rundi ti mega Kaban Kunsil Nengeri ( ADUN) Kemena mansutka pekara nya lebuh dikerandau raban pengarang berita bekaul enggau atur mutarka 18 sungai ke nyadi pemansut ai mata ti dikategori Opis Audit setengah kamah, apin lama.

Dulu ari nya Dr. Rundi bejadika logo baru Opis Menteri Utiliti ke diatur ba Auditorium, Begunan Pelita, The Isthmus ditu, kemari.

“Aku minta kerejasama ari semua, nyema bisi penerang ari mensia mayuh kami deka ngambi sereta ngemeratka pekara nya nitihka pematut,” ku iya.

Ripot Ketuai Audit Negara 2016 Siri 1 apin lama, minta opis ti bekaul enggau naya ai di Sarawak ngangkatka kerejasama enggau NREB mutarka penanggul 18 buah sungai ke nyadi pemansut ai mata nengeri ti dikategori setengah kamah.

Ripoot Audit nya meri penemu ngagai opis bekaul nya ngambika ngazet endur nekat ai ke ditemu enggau jampat dikena nyeliahka ari sebarang aktiviti ke enda dikemendar dikereja ba endur nya.