Main asal kuntau makin diterima raban nembiak komuniti Iban

MIRI: Kuntau bansa Iban endang main asal sereta patut ditampung kenyau ari beratus taun, Kuntau makin dikerindu raban nembiak kemaya hari lalu nerima sukung ari bala ketuai komuniti Iban kelebih agi Gerempung Ukai Dikuasa Perintah ( NGO) Dayak Iban.

Raban ketuai NGO Dayak iban bela meransang bala kaban sida ngambi bagi dalam pengawa Kuntau ukai semina dikena ngetanka diri, tang mega dikena ngetanka seiti ari main asal bansa Iban.

“Sebaka enggau Ajat, Kuntau nyadi seiti ari main asal bansa Iban, semina bida iya Ajat di atas panggau seraya Kuntau di kelang,” pia ku Ketuai Pampang Serakup Dayak Sarawak ( PEDAS) Bintulu, Pete Bujang.

“Diatu mayuh kelang Kuntau udah dibuka bala guru Kuntau dikena ngajar raban nembiak Iban ti rinduka seni tu. Nyadi sebengkah serakup ke mega ngetanka main asal bansa Dayak, PEDAS endang nyukung pengawa tu,” ku iya madah ngagai Utusan Borneo ditu.

Nya alai ku iya, PEDAS kelebih agi di Bintulu endang meransang bala kaban sida masuk kelas Kuntau tu, nyadi pengawa ngaul komuniti Dayak, kelebih agi Iban, enggau seiti ari main tauka main asal ti majak lenyau.

Kelimpah ari nya, nengah Kuntau mega tau nerenakka gaya idup bepengerai sereta disiplin ngagai raban nembiak nyereta seni Kuntau tu, ku Pete nerang.

“Enggau penyereta raban nembiak tu, kitai ngarapka ulih ngidupka baru seni Kuntau, begulai enggau bala guru Kuntau ke bisi,” ku iya.

“Enti ulih kitai dekaka seni Kuntau diangkat sama tinggi baka seni ngetanka diri bansa bukai,” ku iya nerang baru.

Tambah mega PEDAS Bintulu endang nyukung pengawa ngelaku sereta mantaika seni Kuntau tu ngagai raban nembiak sereta sedia mantu sebarang guru Kuntau ti bisi ati ngambi nembiak ngambika diajar enggau dilatih.

Dulu agi ari nya, iya udah ngulu pengawa nutup enggau tamat kelas seni Kuntau ari Kelang Kuntau Lang Nginau ti dipenggi guru kuntau, Guro Angkah Suring.

Kelimpah ari Pete, sama bisi datai Guro Fedrick Tutong, Guro Matthew Kunsoi enggau Guro Tommy Emong. Sida empat tu guro Kuntau nyadi sebagi ari urung 20 iku guro ke bisi di Bintulu.

“Sida tu bela bisi kelang kuntau kediri empu sereta bisi bungai kuntau ti bebida enggau pangan diri,” ku iya seraya nampung, kuntau nyadi seni ngetanka diri bansa Iban ti nyelai amat.

Kebuah pia ku iya, tetiap guru bisi bungai kuntau kediri empu ti ditampung ari aki ini sida, beratus taun pengelama.

Nitih ku iya, bisi sekeda enda entu regas agi ketegal umur guru nyau manggai sereta nadai nembiak dilatih.

Ba lansa ke bukai, bisi semilan iku nembiak di Kelang Kuntau Lang Nginau namatka latih sida kena 23 Julai tu tadi.

Barang sapa ke bisi ati belajar kuntau tauka deka nemu penerang silik tau betelefon nuju Pete ( 014- 5767523) enggau Guro Angkah (0148989707).