Penyampau nembiak ngambi kus Sains, Injinir ngirauka ati

KUCHING: Penyampau nembiak sekula ke udah nembuka pelajar di sekula sekondari lalu masuk universiti lalu ngambi kus Sains enggau Injinir kurang ari 23 peratus.

Menteri Pelajar, Sains enggau Pansik Teknologi Dato Sri Michael Manyin anak Jawong madah, penyampau nembiak ke mimit ngambi kus Sains enggau Injinir nya ngirauka ati.

“Kebuah enda mayuh laban penyampau nembiakke mujur nengah program STEM (Sains, Teknologi, Injiniring enggau Matematik) di Sarawak semina 23 peratus aja, lalu enti diperundingka berapa penyampau pemayuh nembiak Bumiputera ari 23 peratus nya? Engka kurang ari 10 peratus.

“Penyampau nya ke majak mimit ngirauka ati laban dalam kandang entara 10 ngagai 20 taun tu ila, pemayuh peluang gawa ke bisi dalam makit kereja, urung 70 peratis nyentuk 80% bekaul enggau Injinir sereta Sains.

“Aku pechaya siti ari kebuah nembiak enda beminat dalam Sains enggau Matematik laban sida enda diajar ngena chara ke betu ba renggat sekula primari,” ku iya.

Taja pia, kitai mega enda ulih nyalahka pengajar tauka orang bukai laban sekeda ari pengajar ke ngajar ba sekula primari nya nadai peamtut ngajar Matematik enggau Sains, tang sida iya diansak ngajar subjek nya ketegal nadai pengajar bukai ke landik ngajar subjek nya, ku iya.

Berindik ari nya, Manyin madahka iya deka betemu enggau semua Kaban Kunsil Nengeri (Yang Berhormat) madah ngagai sida iya pasal pemerat tu, Sains enggau Matematik nyengkaum SKM.

“Kami deka ngaga pengawa pemandang nerangka reti pekara tu ngagai apai indai ngambika ulih ngemanahka pemutus peresa nembiak sekula kelebih agi ba nembiak sida tikas primari, lalu ditangkan enggau sekondari enggau tikas pemungkal ba renggat kolej tauka universiti,” ku iya.

Nitihka litericha ku iya, penyampau ke manah ba pemayuh nembiak ba sesebuah sekula primari urung 300 nyentuk 400 iku, lalu ke sekondari, entara 600 nyentuk1000 iku.

“Enda tau kurang ari penyampau nya, enggai ke enda efektif, tang ba kitai di Sarawak, penyampau nembiak ti manggai 150 iku, kitai bisi urung 651 sekula lalu baru 300 iku nembiak, kitai bisi 1,008 sekula.

“Enti dibanding nembiak ke besekula di menua pesisir enggau mengeri, menua pesisir ke pemadu mayuh penyampau nembiak kena tinggal dalam pelajar dibanding enggau nembiak di mengeri. Taja pia, pemutus ti diulih nembiak di mengeri bedau entu ulih ngelantangka ati,” ku iya.

Sama bisi enggau ngulu aum media nya kemari, Mandal Canselor Universiti Malaysia Sarawak (UNIMAS) Prof Dato Dr. Mohammad Kadim Suaidi, Sapit mandal Canselor (Pekara bekaul enggau Nembiak Universiti eggau Alumni) Prof Mohd. Fadzil Abd Rahman, enggau chairman pengatur pengawa Dr. Wong Swee Kiong.