Komiti pengatur PM, PG enda patut belalai ba pemutus Kanun Tanah S’wak
SIBU: Perintah nengeri nengah komiti ke ditumbuh ti mutarka isu Pemakai Menua (PM) enggau Pulau Galau (PG) dikeandal ngembuan ulah terus terang ba pemutus bekaul enggau Kanun Tanah Sarawak.
Ke sekali tu, Dayak ThinkTank ( DTTG) pampang Miri betuaika Elias Lipi Mat madah gerempung sida minta raban profesional enggau NGO Dayak diberi awak tauka akses merati sereta nemu silik agi draft pansik ke digaga komiti PG enggau PM bekaul enggau dua bengkah isu nya.
“Tu dikena nentu bakani ke draft nya ulih mai pengelebih enggau penguntung ngagai bansa Dayak di Sarawak.
“Kitai mega deka nemu naka ni pengamat Perintah Nengeri natak pemesai PM enggau PG tu, setengah jam bejalai kaki ari sesebuah rumah panjai,” pia ku iya madah.
Iya ngarika DTTG mantaika peminta nya bepun ari ketuai komiti PM enggau PG ti mega Sapit Kepala Menteri Datuk Amar Douglas Uggah Embas madahka diri deka mantai asil pansik sida ngagai Kepala Menteri enda lama agi baka ke dipansut ba surat berita, ensana.
Nambahka jaku iya, Elias madah, ubah Kanun Tanah Sarawak berita manah ngagai bansa Dayak ditu lalu enti nitihka rikod DTTG, bisi 400 iti kes ti empai diputarka ba kourt bisi awak deka bulih pemutus ke manah nangkan ke tu.
“Tu juluk ati kitai, rayat nengeri tu deka meda konsep PM enggau PG dikenukuka perintah nengeri enda lama agi.
“Ketegal nya, kami DTTG gaga amat maya nerima berita perintah nengeri ngaga Komiti PM/PG dikena ngiga chara mutarka isu ti bekaul enggau chara manah laban nyauka setengah kes besai tanah dipechara ba kourt endang tanah Hak Adat Bumiputera (NCR).
“Bansa Dayak udah alah bepuluh iti kes bulan Julai suba lalu tu nejuka kami enda lantang ati sereta nangika perintah nengeri enda tejagaka pengelikun pendiau rayat pupu bansa ditu,” ku iya madah baru.
Berindik ari nya, DTTG minta komiti PM/PG nya enda kelalu lama ‘mansik enggau silik’ dua bengkah isu tu bepun jaku komiti nya baka ke dibantai surat berita semina madah andal isu nya
ulih diputar enda lama agi tang enda netapka kemaya.
“Sebedau tu mega kitai kala ninga sida madah enda lama agi...tang diatu udah nyauka lapan bulan, bedau bisi pemutus ari pansik sida,” pia ku iya.