Komuniti patut meri kerejasama ngagai perintah
Ngambika projek pemansang ulih terus dipejalai seraya nyungkak pemansang ekonomi di menua pesisir
SPAOH: Tanggungpengawa komuniti ti dalam kandang endur projek pemansang ke disediaka perintah deka meri empas ti positif dikena nentuka pemansang genturung pendiau seraya ulih nyungkak ekonomi peranak ti diau di kandang menua pesisir.
Kaban Kunsil Nengeri (ADUN) Saribas Mohamad Razi Sitam madahka projek pemansang ke digaga perintah deka meri pengelantang sereta nyediaka perengkaguna pemun ngagai komuniti.
“Perintah nyediaka pelasar ngambika ulih nyadi peransang dikena nyungkak pemansang komuniti di menua pesisir dikena nyeliahka sida tinggal nerima perengkaguna pemun ungkup pengelantang peranak menua pesisir.
“Tang nama utai ti nyadi, bisi sekeda penanggul ti ditapi bekaul pengawa bejalaika projek ngemanahka jalai ngelawa rumah tetiap peranak ti bepun ari mayuh pekara,” ku iya.
Ku iya madah, pekara tu endang chukup ngenusahka ati laban penanggul ti nyadi ulih diputar nyema bisi komitmen ari semua peranak di genturung pendiau ti pia mega ulih ngelancharka pengawa bejalaika projek pemansang di sitak sida empu.
Iya bejaku munyi nya lebuh ti ngenang pekara bekaul enggau penanggul ti ditapi ba projek pemansang di sitak iya rambau pengawa ngabas projek di Kampung Sebemban ke udah nerima sebana ari mensia mayuh, ditu.
Ku iya nambah, kerjasama semua piak endang patut ngambika ulih mutarka penanggul nya.
Iya mega ngansak peranak di genturung pendiau nya ngambi ngemeratka penyerakup ti ulih ngemudahka semua pekara dipejalai ke lalu ulih mutarka penanggul ti ditapi.
“Beserimbai enggau nya, dalam pekara tu aku meda semua peranak di genturung pendiau nya patut bekerejasama berandau kena ngiga pemutus begulai dikena mutarka pekara tu.
“Aku minta ngambika enda nambahka penanggul dalam pengawa ngaga projek pemansang, tang patut meri kerejasama entara pangan diri ngambika projek ke dipejalai enda tetangguh,” ku iya.
Raxi ngarapka tetiap ketuai di renggat pemun ulih bejalaika tanggungpengawa ti patut ke ulih nyaup mutarka sebarang isu enggau penganggul ti ditapi.
“Putarka enggau lengkas. Aku endang ngarapka isu tu ulih diputar enggau lengkas ba renggat genturung pendiau nengah kerejasama semua rayat dikena nentuka projek nya siap enggau lengkas,” ku iya nyemetak.
Perintah nyediaka pelasar ngambika ulih nyadi peransang dikena nyungkak pemansang komuniti di menua pesisir dikena nyeliahka sida tinggal nerima perengkaguna pemun ungkup pengelantang peranak menua pesisir. Mohamad Razi Sitam ADUN Saribas