Ripot belanja MRP patut dianjung
Chairman JKKK dipinta nganjung ripot projek ke dipejalaika sida
MIRI: Sapit Speaker Kunsil Nengeri (DUN), Datuk Gerawat Gala minta bala ketuai raban bansa tauka chairman komiti pemansang enggau pengelikun (JKKK) sereta gerempung nganjung ripot bekaul engagu projek ke dipejalaika sida ngena agih belanja ke udah diberi perintah.
Iya ke mega Kaban Kunsil Nengeri (ADUN) Mulu madah, ripot nya beguna amat ke tuju matau genap projek ke dipinta nya, dikemendar lalu dipejalai ke pemaik semua piak.
“Nyema kita minta (projek) ngaga jalai rumah panjai, jematan tauka projek bekaul ke bukai, tentuka projek nya dipejalai nitih agih ke udah diberi.
“Aduka ripot lalu sua ngagai aku, ngambika aku nemu kita bisi ngereja pengawa lalu naka ni pemujur pengawa nya, awak aku nemu nyema agih enda chukup tauka bisi penanggul bukai,” ku Gerawat rambau pengawa nyuaka geran enggau projek mit pemansang menua pesisir (MRP) ba Bilik VIP, Padang Bilun Miri ditu, lemai ensanus.
Kenu ku Gerawat, iya nadai begunaka ripot ti kelalu panjai tang mih asal bisi dianjung hambar sereta penerang ke pemadu baru pasal pejalai projek nya, taja pan nengah telefon pintar.
Ku iya, ripot tu beguna amat ke nguna iya empu, dikena nentuka agih belanja rayat dikena enggau manah lalu rayat ba Mulu ngaga projek nitihka peneka diri lalu engkeman enggau guna sida.
Berebak enggau nya, bisi 15 buah JKKK enggau Gerempung Apai Indai enggau Pengajar (PIBG) ba sitak DUN Mulu nerima chek MRP nya nyengkaum sekeda gerempung ukai dikuasa perintah (NGO) ba Miri.
Urung RM208,000 geran diberi ngagai 15 buah organisasyen nya ensanus, sebedau nya, iya bisi nyuaka chek ke sebaka ngagai 17 buah JKKK, PIBG enggau NGO enggau penyampau agih RM344,000.
“Semua agih MRP ke udah disuaka aku iya nya RM552,000,” ku iya.
Nyema kita minta (projek) ngaga jalai rumah panjai, jematan tauka projek bekaul ke bukai, tentuka projek nya dipejalai nitih agih ke udah diberi. Datuk Gerawat Gala Sapit Speaker DUN Sarawak