Peratika dulu gaya hari sebedau nurun berikan ke tasik
MIRI: Semua orang berikan ditu dilalau ngambika dulu beratika gaya hari tauka nanya penerang pemadu baru ari Opis Pengemata Gaya Hari sebedau sida ngaga pemutus nurun berikan ke tasik.
Chairman Gerempung Orang Berikan Menua (PNK) Miri Jamali Basri madah, berindik ari gaya hari ke nadai tentu jam ke diatu diumba enggau tasik begelumbang, sida patut nemu nyaga pengelikun diri lalu nyeliah diri nurun berikan nyema gaya hari enda manah.
“Orang berikan ke deka nurun ke tasik sekalika mukat tauka ngintu, patut dulu betanya ngagai Opis Pengemata Gaya Hari mending pelaba gaya hari ari radio tauka televisyen ngambika kita sama nemu pendiau tasik sekalika likun endur ngintu tauka mukat,” ku iya madah ngagai Utusan Borneo ditu, kemari.
Iya madah munyi nya, lebuh nimbal pasal gaya hari ke suah kudi, nyadi ba Miri dalam seminggu tu, nyentuk bisi sekeda menua ke landai kena bah tunggal.
Jamali mega ngelalau orang berikan ngambika seruran mai jikit pengelikun enggau perengka ke beguna maya ba tasik, nyema nyadi sebarang kes enda disadang semua perengka meseti chukup nyengkaum bekal pemakai enggau telefon binching.
Ku iya, ba gaya hari ke enda tentu, kekadang ujan bangat sereta berunggu ujan sepanjai malam kenyau beberapa hari ke udah, endang tau bendar ngenusah orang berikan lebih agi bot-bot mit.
“Ungkup bot-bot ke besai mimit engka nadai penanggul, tang bala tauke ke mai orang nginti patut tentuka bot sida ngembuan perengka baka GPS, walkie- talkie enggau bukai manah magang, awakka piak bekuasa muntang ngiga sida, nyema bisi penusah enda disadang nyadi ba tasik,” ku iya.
Jamali madah nyentuk taun tu, nadai kes baru orang berikan ba Miri ke diripot anyut tauka lenyau ba tasik laban sida diatu udah pandai nguna perengka teknologi moden endur ngulihka penerang pasal gaya hari, nyengkaum pasal pekara bekaul pengelikun.
“Aku chukup berasai gaga meda ubah baka tu, lebih agi ba raban orang berikan di Miri.
“Sida diatu majak nemu nguna perengka telefon pintar, endur ngulihka penerang kelimpah bekunsi berita, penemu enggau pekara bukai,” ku iya.
Kenu ku iya, nengah telefon pintar ke dibai, sida engka ulih mantu pangan diri ba darat tauka mantu kaling ke tusah maya ba tasik.
“Nama utai ke beguna iya nya patut bejimat maya ba tasuk, laban sebarang maya gaya hari ulih berubah ngenyit sereta tusah deka disangka, ari manah ulih begelumbang ngenyit,” ku iya.
Taja pia, ku Jamali, manah agi enda ibuh nurun ke tasik nyema Opis Pengemata Gaya Hari udah madah gaya hari enda manah ungkup bot-bot mit. SIBU: Jeragan bot ekspres dilalau bejimat maya bejalaika pengawa ngundan mensia mayuh dikena nentuka pengelikun bala penumpang.
Chaiman Kaunsil Sungai-Sungai Sarawak (LSS), Dr Murni Suhaili madah, jeragan patut bejimat maya deriba bot ekspres diri lebih agi laban mayuh papung batang anyut ba sungai.
“Jeragan patut bejimat enggau ubah gaya hari lebih agi ba sitak ulu Batang Rejang, laban tikas penalam ai dipelaba niki sereta deras.
“LSS deka bejalaika pengawa matau ba sepanjai Batang Rejang dikena nentuka semua perengka pengangkut sungai tu ulih nitihka atur ke udah ditetap,” ku iya maya dirandau, ensanus.
Murni mega ngelalau bala jeragan ngambi ngidupka lampu nyema mata rapas meda utai maya mansa tiku sungai.
Iya madah munyi nya berindik ari penusah bebadi bot ekspres enda jauh ari Kapit kena Hari Dua tu tadi ke ngundan urung 100 penumpang.
Bot ekspres nya diperitaka ngelantak kayu ke melepung, ngujungka bot bumbus sereta tama ai.
Taja pia nadai penumpang baka laban jeragan nya lanchat mai bot ekspres ngelawa tebing sungai, ngujungka semua penumpang ulih pansut enggau selamat.