Barang sapa ti benung ngiga kereja ditesau nguna perengka ba opis JTK
BINTULU: Barang sapa ke benung ngiga kereja ba menua tu ditesau nguna perengka Opis Menteri Penguasa Pengereja Pengawa nengah Opis Penguasa Pengereja Pengawa (JTK) ba tiga endur nyengkaum JTK Sarawak, JTK Sabah enggau JTK Semenanjung Malaysia endur ngiga kereja.
Menteri Penguasa Pengereja Pengawa, Dato’ Sri Richard Riot Jaem madah, entara perengka disedia ungkup sida ke benung ngiga kereja iya nya perengka ngerejista diri ba JobsMalaysia nengah chara peda ba laman web bekaul enggau pengawa berejista ba JTK ke bisi ba serata menua.
Iya madah, fasiliti bukai iya nya Skim Latih 1Malaysia (SL1M) ba baruh Opis Menteri Besai (JPM) enggau Unit Pengatur Ekonomi (EPU).
“Graduet ulih ngerejista diri ba laman web disedia, tang aku nemu enda mayuh anak Sarawak ke ngambi peluang ngerejista diri ba SL1M tu.
“Nengah skim tu, piak bekaul deka ulih mantu graduet bulih kereja kelimpah tau teulih ka pengidup ke mujur dudi hari,” ku iya rambau bejadika Minggu Ngiga Kereja Kenyalang Renggat Nengeri Sarawak ba Dewan Suarah ensanus.
Berebak enggau nya, ku iya perintah nengeri Sarawak mega bisi skim latih ke diri empu dikena nambahka pengelandik graduet ba nengeri tu lalu ngarapka iya ulih mantu graduet nya nangkup pengawa ke bisi disedia.
Iya madah, ari statistik orang nadai kereja dirikod ba menua tu urung 14.2 juta iku bisi batang pengawa lalu laluh iya 504,100 iku tauka 3.4 peratus agi bedau bulih kereja nyengkaum 31 juta populasi ba serata menua.
“Ari 504,100 iku ke bedau bulih kereja nya, urung 160,000 iku ari sida pas degree,” ku iya.
Iya madah, ungkup Sarawak ari populasi 3.1 juta iku, urung 1.26 juta iku bisi batang pengawa lalu 1.2 juta nadai kereja tauka kurang 42,000 iku rayat Sarawak bedau bulih kereja.
“Taja jauh ari penyampau 4 peratus, kitai di Malaysia agi ngembuan pengereja pengawa tang agi mayuh ke patut digaga kitai. Aku pechaya nengah pengawa muka palan beranak puku ba Samalaju (Bintulu) mayuh pengawa apuang deka dibuka,” ku iya.
Nya alai, ku iya, pengawa ngatur Program Minggu Kerjaya Kenyalang Tikas Nengeri Sarawak deka ngemuntangka raban ti benung ngiga kereja bulih pengawa lalu pengaji mega bulih pengereja pengawa ke engkeman enggau pilih sida.
Ku iya, program nya bepun ba Bintulu ditangkan ba Bekenu (19 Ogos), Marudi (20 Ogos), Limbang (21 Ogos) enggau Lawas (23 Ogos).
“Urung 1,518 pengawa puang disedia ungkup siswazah enggau 10,044 pengawa puang ungkup sida ke ukai siswazah lalu 94 pengaji nyediaka 11,562 pengawa puang ngagai raban ke ngiga pengawa nyerumba program nya,” ku iya.
Bela bisi datai Direktor Penguasa Pengereja Pengawa Sarawak, Jack Meredu Anak Ko; Sekretari Unit Servis Pengatur Opis Menteri Penguasa Pengereja Pengawa, Che Azizah Che Rashid enggau Sapit Residen Bintulu, Hamdiah Bakir.