Tim Komiti MH370 mansik langgur penemu piak ti keran nyidi MH370

KUALA LUMPUR: Tim Komiti MH370 benung mansik sekeda langgur penemu ari piak ti keran deka nyidi bilun MH370 ke lenyau, ku Kepala Direktor Opis Penerebai Periman (DCA) Datuk Azharuddin Abdul Rahman.

Iya madah tu bepelasarka semua penerang ke bisi dikembun nyengkaum ripot Ngiga Commonwealth Scientific and Industrial Research Organisation’s (CSIRO) for MH370 and Surface Drift – Siri III dipansutka Biro Pengelikun Perengka Pengangkut Australia (ATSB) kemari.

Azharuddin madah, pekara tu deka dibai ngagai perati Australia enggau China ngambi ngulih penemu ari sida.

“Aku deka madah juluk nyidi MH370 sigi enda dileka lalu genap pemutus ke digaga endang seruran bepelasarka semangat kerejasama tiga piak ari tiga menua,”ku iya nengah sebengkah penerang kemari.

Bilun Malaysia Airlines Penerebai MH370, ngundan 239 iku penumpang enggau staf bilun, lenyau ari video radar pengudah bekejang ari Kuala Lumpur maya terebai ke Beijing kena 8 March, 2014.

Azharuddin madah, ripot nya mandangka penerang silik pasal gaya pejalai MH370 anyut ba tasik ke udah ditapis bepelasarka penerang enggau gambar satelit.

“Kami terus ngiga penerang baka ripot nya ulih mantu nyidi endur bilun tu,” ku iya.

Azharuddin madah, maya aum Tiga Pihak renggat Menteri kena Julai taun nyin kemari, Perintah Australia, Malaysia enggau China bela setuju deka berundingka atur ke patut digaga nyema bisi penerang pemadu baru sereta ulih dikearap alai ngiga bilun nya.

Ba sebengkah penerang ke dipansut nengah laman web ATSB kemari, Ketuai Tinggi ATSB, Greg Hood madah piak sida udah ngemansutka dua ripot kemari, disediaka Geoscience Australia dan Commonwealth Scientific and Industrial Research Organisation (CSIRO), pasal pansik sidi gambar ari satelit ke diambi kena 23 Mac, 2014, dua minggu pengudah bilun MH370 lenyau, ba selatan Lautan Hindi.

Hood madah raban pengereja landik ari Geoscience Australia udah ngelala sekeda utai empat gambar satelit ke diambi nengah bantu piak bekuasa Perancis, dikategori perengka digaga mensia.

“Resolusyen gambar ke enda terang ngujungka tusah ngenukuka sekalika utai nya ari MH370 tauka utai bukai nyangka melepung ba tasik lalu bisi mega ba endur bukai,ku iya.

Nitihku penerang ATSB, laban penyauh takah ngelawa sitak tasik ke ditaga, CSIRO bejalaika pansik ‘drif’ dikena nentuka ari penatai perengka geografik ke dipeda dalam gambar satelit awakka ulih ngelala dini alai perengka nya maya 8 March, 2014.

Iya madah pansik ‘drif’ tetemuka palan ke dipadah kena 8 Marchpasal perengka ke ditemu nya tebal agi gambar ari satelit lalu dipansik raban orang landik maya bejalaika Pansik Prinsip Lumur Satu MH370 kena Nov 2016.

“Ku iya, kitai patut bejimat. Perengka nya bedau dikenuku barang ari MH370,” ku Hood. — Bernama