Masing muji pengawa dikereja Yayasan Sarawak
KAPIT: Sapit Kepala Menteri Sarawak, Tan Sri Datuk Amar Dr James Jemut Masing muji Yayasan Sarawak ti udah nguna belanja sida meri pelajar ngagai nembiak rebak bari di menua tu. Ku iya, semina nengah sida (raban nembiak ke bepelajar) menua tu ulih nyingkang ke mua. Yayasan Sarawak nguna pemansut ke dikemisi dikena meri pelajar ngagai semua serak di menua tu.
“Munyi ku jaku sempama bansa China, enti kita deka bumai, patut nyendiaka di pengelama setaun. Enti kita deka nanam kayu patut nyendiaka diri pengelama sepuluh taun lalu enti kita deka mensia patut nyendiaka diri pengelama 100 taun.
“Nya kebuah Yayasan Sarawak ngereja pengawa ke betul, sida nguna belanja meri pelajar ngagai raban nembiak di menua tu ”, Ku Masing lebuh nyuaka ’Baucer Bantuan Pakaian Seragam Tajaan Yayasan Sarawak Tahun 2017’ ngagai 500 iku nembiak di Pelilih Kapit enggau Bukit Mabong kena Hari Lima tu tadi.
Lima ratus iku nembiak ari 40 buah sekula primari enggau 4 sekula sekondari ditu.
Penyampau baucer bantu pakayan seragam’ beungkus RM 200 sepasang tauka RM 100,000 semua nya.
“Dalam timpuh 30 taun ke kelia, Yayasan Sarawak mengkang suntuk duit laban semina bulih RM 0.80 sen ari se tan aset kayu. Taja pia pengudah Kepala Menteri YAB Datuk Amar Abang Zohari beratika rega nya baru, iya udah nikika penyampau kayu nya ngagai RM 50 se tan. Nya lalu nambahka pemansut ngagai Yayasan Sarawak beratus juta ba taun ti deka datai. Ngena penyampau nya, sida ulih ngeluar belanja ke chukup ngagai bidang pelajar ke peranak menua tu. Ngena duit nya mega aku pechaya mayuh agi rayat deka dilatih lalu mayuh mega nembiak ti bulih pemaik ”, ku iya.
“Aku ngarapka nengah penambah jalai pemansut tu,mayuh agi sekula di Kapit nerima bantu pekayan seragam. Aku meri besai terima kasih ngagai Yayasan Sarawak enggau Kepala Menteri ti udah nikika penyampau pe- mansut nya”, ku iya.
Sama bisi datai maya nya Sapit Menteri Pemansang Menua Pesisir enggau Kandang Menua Datuk Alexander Nanta Linggi, MP Hulu Rajang Datuk Wilson Ugak Kumbong, Kaban Kunsil Nengeri Pelagus Wilson Nyabong Ijang, Kaban Kunsil Nengeri Bukit Goram Jefferson Jamit Unyat, Kaban Kunsil Nengeri Murum Kennedy Chupai, Sekretari Politik Kepala Menteri Sarawak, Residen Kapit Joseph Belayong, Sapit Residen Kapit Galong Luang, D. O Kapit Elvis Didit, Pemesai Opis Pelajar Kapit Ringgit @ Gawan among ba pengawa nya ti diatur ba bilik konferen Bletih Kompeks Nengeri ditu.