Annuar Rapaee: Sekula kurang nembiak deka digempung ba sebuah sekula aja

SANTUBONG: Sekula kurang nembiak deka digempung ba sebuah sekula berengkah ari taun baru,Ku Menteri Muda Pekara Pelajar enggau Pansik Tekonologi Dr Annuar Rapaee.

Iya madah, pansik ke silik ba sentang bagi sekula endur ngempung sekula kurang nembiak udah digaga sereta diputus.

“Kitai udah tetemuka 127 buah sekula ti deka nyadi ‘Anchor School’. Reti nya nembiak ari sekula ke kurang nembiak deka digempung ba sekula tu.

“Pemar di Sarawak iya nya kitai kelalu mayuh sekula ti kurang nembiak, kurang ari 150 iku nembiak,”ku iya.

Annuar mansutka jaku nya lebuh dikerandau pengarang berita pengudah bejadi Program XPDC Siswa Kenyalang 1.0 ke diatur di Kampung Salak ditu, ensanus.

Tajapia, iya madah atur ngempung nembiak ba sebuah sekula nya enda ulih dipejalai enggau beguai ke alai perengka guna ba sekula nya deka disedia enggau chukup dulu.

Kedua ku iya, raban pengajar mega deka digempung ba sekula ke dipilih lalu meri pengelantang ngagai nembiak teulihka bengkah pelajar ke manah.

“Diatu kitai deka milih sekula ke deka nyadi ‘Anchor School’ sereta mega kandang endur ke engkeman.

“Kitai udah netapka tiga buah sekula ke tau dikumbai sekula buruk ke alai nembiak enda tau enda dipindah.

“Bengkah ketiga, iya nya sekula ke udah beumur lebih 50 taun ke digaga nguna keresa kayu, kurang nembiak deka dulu dikemerat,’ku iya seraya madahka Sarawak bisi lebih 400 buah sekula ba kategori bengkah ketiga.