Rumah Cecelia dipilih endur numbuhka PWPK
SONG: Rumah Cecelia Bunsu Sebat ba Nanga Kebiau di Song udah dipilih Opis Ngemansang Pekebun Mit Industri Getah ( RISDA) endur numbuhka Program Gerempung Pekebun Getah Orang Indu ( PWPK).
Tu keterubah PWPK di tumbuh di pelilih Song lalu kedua di Bagi Menua Kapit division pengudah PWPK Rumah Juin.
Ku direktor Risda Sarawak Zulkefli Zaini, pekebun mit orang indu deka bulih pemaik ari bantu ke diberi nengah program nya.
Ku iya,diatu bisi 10 iku pekebun getah mit ari Rumah Cecelia nyereta program nanam baru getah Risda ti dipunka taun siti nyin tadi.
“Bisi lima iku pesereta ari rumah panjai nya ngerejista diri ba program nya taun tu tadi. Aku pechaya lima iku ke baru dipilih nya bepelasarka pemanah pengawa ti dikereja 10 iku pesereta ke diatu,” ku iya madah maya program ‘ Sayauka Pekebun Mit’ ti diatur Risda Sibu ba rumah panjai nya kena Hari Minggu nyin tadi.
Sapit Menteri Pemansang Menua Pesisir enggau Kandang Menua, Datuk Alexander Nanta Linggi nyadi temuai ti dipebasa ba pengerami nya.
Dulu ari nya, Zulkefli meransang pengempu tanah ti bisi pun getah tuai ba tanah sida, datai ngagai dedini endur opis Risda, minta masuk ba program nanam getah baru.
Ku iya, pemendar deka diberi ngagai pengempu tanah ti nitihka kriteria ke ditetap Risda.
“Enti sida mujur dirintaika nama dalam program, sida deka diberi bantu RM13,500 se ekar tanah.
“Risda mega deka mekal paung getah enggau baja ngagai pesereta,” ku iya.
Berebak enggau nya, Nanta lebuh ke bejaku madahka sepenyampau RM18,000 udah diungkupka Risda Sarawak taun tu ngagai 15 PWPK ti ngembuan 300 iku kaban di serata nengeri ke bejalaika pengawa sida.
Ba pengerami nya, Nanta mega bisi nyuaka geran Projek Mit Pemasnang Menua Pesisir (MRP) ngagai lapan penerima. Iya mega bisi madahka deka meri geran RM20,000 dikena nyilih paip ai di Rumah Cecelia lalu RM5,000 agi ungkup Biro Indu.