Rintai kaban kaunsil direktor Petros dipadah minggu baru
Udah nya aku nyerahka ngagai kaunsil nya bakani sida deka bejalaika Petros, ku Abang Johari
KUCHING: Nama lima iku Kaban Kaunsil Direktor kompeni minyak enggau gis Sarawak tauka Petros dipelabaka deka dibantaika dalam timpuh seminggu tu.
Pekara nya dipadahka Kepala Menteri Datuk Amar Abang Johari Tun Openg ba sebengkah aum pengarang berita ke diatur ba sebuah hotel ditu, kemari.
“Kitai nyiri Kaban Kaunsil Direktor (Petros) baka ke dipadahka aku sebedau tu, sida bisi lima iku.
“Aku deka meri kita (media) rintai nama penuh (kaban kaunsil direktor) dalam minggu tu.
“Udah nya aku nyerahka ngagai kaunsil nya bakani sida deka bejalaika Petros,” ku iya dalam aum pengarang berita seraya madahka baka ke ngaga semaya pasal nama Ketuai Pemesai Eksekutif DBOS (Bank Pemansang Sarawak) sebedau tu.
Dulu ari nya Abang Johari ngemataka pengawa nyain sempekat kerejasama entara Petronas Carigali Sdn Bhd
Kitai nyiri Kaban Kaunsil Direktor (Petros) baka ke dipadahka aku sebedau tu, sida bisi lima iku. Datuk Amar Abang Johari Tun Openg Kepala Menteri Sarawak
enggau Brooke Dockyard ti deka bekerejasama bejalaika dua projek iya nya Anjung Facilities enggau Bokor Phase 3 Re-Development Wellhead Platform (WHP).
“Kitai numbuhka kompeni minyak enggau gis kitai empu, ngambi kitai kitai ulih sama chakah ngambi bagi ba pemungkal (upstream), tengan (mainstream) enggau pengujung (downstream) ba industri tu,” ku iya.
Ba sebengkah pengerami sebedau tu Abang Johari mega kala madahka lima iku ke dichirika nyadi kaban kaunsil nya endang peranak menua Sarawak, raban profesional sereta orang ti udah pinchin ari Petronas enggau Shell.
Berebak enggau nya mega iya madahka CEO Petros mega bedau dichiri laban nya bepanggai ngagai kaban kaunsil nentu sereta milih sapa CEO ti pemadu manah sereta bisi penelaba.
Kelimpah ari nya lebuh ti ditanya bekaul enggau industri pun iya madahka perintah nengeri nempa kerejasama enggau Petronas ngerandang tauka ngiga kandang endur nyengkaum ba darat ke bisi minyak atau gis ke disimpan.
Iya madahka asil pengawa pemansik bekaul enggau nya udah dipejalaika tang bedau disimpul.
“Selalu iya ke bisi bekal (minyak enggau gis) tu ba menua adap ke utara Sarawak baka di Baram enggau bisi endur bukai agi,” ku iya.
Lebuh ke ngenang kerejasama entara Brooke Dockyard enggau Petronas Carigali Sdn Bhd maya bejaku ba pengerami nya, Abang Johari madahka, nya deka meri peluang ngagai perintah nengeri ngelangkar nengeri jemah ila ke ngena teknologi baru kelimpah ari Sarawak ke endang udah teleba 107 taun dalam industri minyak enggau gis.
Sama bisi dalam aum pengarang berita nya kemari, Menteri Muda Perengka Pengangkut Datuk Dr Jerip Susil, Chairman Brooke Dockyard Datuk Abang Abdul Karim Abang Openg, Presiden & Group CEO Petronas Datuk Wan Zulkiflee Wan Ariffin enggau ke bukai.