Enam sekula ba DUN Lambir patut diperunding lengkas
MIRI: Enam buah sekula primari ba sitak Kunsil Nengeri ( DUN) Lambir patut diperundingka lengkas laban ngembuan begunan ke chukup buruk.
ADUN Lambir Ripin Lamat madah, sekula ke patut digaga baru tu iya nya Sekula Primari (SK) Tawakal, SK Ulu Satap, SK Keluru Tengah, SK Subak, SK Kelapa Sawit No. 2 enggau SK Beraya.
“Amat kami udah dipadah, mayuh begunan buruk ba menua pesisir. Ba sitak Lambir tu aja, bisi enam sekula ba kategori sekula buruk lalu patut diperunding digagaka beguna baru ke lebih menyana,” ku iya rambau pengawa nyuaka geran projek mit menua pesisir (MRP) ba dewan Kampung Beraya Bakam ensanus.
Ripin deka meda ubah ba sekula nya enda lama agi nengah pengawa ngemanahka perengka dikena belajar enggau ngajar baka diasai nembiak ba kandang mengeri.
Iya madah, pemansang pelajar nyengkaum pengawa ngaga sekula endang patut diperunding lebih agi ba tikas pengawa piak perintah nengeri.
Penumbuh Opis Menteri Pelajar, Sains enggau Pansik Teknologi dikearap ulih mutar penanggul sekula buruk ba menua pesisir lalu ngamatka juluk ngaga ubah pelajar ba nengeri tu.
Ripin madah, urung RM3 juta udah diagih nengah Projek Transformasyen Menua Pesisir (RTP) dalam timpuh dua taun dikena ngaga sereta ngemanah perengka sekula ba Lambir.
E n t a r a n y a , a g i h RM300,000 dikena ngaga dewan enggau perabung palanpaking kerita enggau RM400,000 dikena ngaga dewan makai SMK Luar Bandar, agih RM300,000 dikena ngaga dewan begempuru SK Kelapa Sawit No 2, agih RM100,000 ungkup projek ngemanahka SK Chung Hua Bakam, agih RM400,000 dikena ngaga dewan SMK Taman Tunku, agih RM400,000 dikena ngaga dewan enggau RM100,000 dikena ngemanah bilik kelas SMK Riam, agih RM540,000 dikena ngemanah dewan, padang main bol enggau futsal SK Lambir Village, agih RM200,000 dikena ngemanah SK Bakam enggau agih RM200,000 dikena ngaga perabung palan gempuru nembiak SK Temenggong Datuk Muip.
Iya ngarapka belanja RTP ungkup sekula ulih ditambah ke pemaik semua sekula ba menua pesisir bekaul enggau pengawa ngemanah sekula.
“Taja pan kitai ngaga nya, enti apai indai enggau pengajar nadai nyaup ngemanahka kualiti pelajar, pengawa ke digaga baka tu baka ke nadai reti.
“Nya kebuah, kerejasama entara pengajar, apai indai beguna amat dikena nentuka bala nembiak belajar enggau manah lalu nyadi orang menyana,” ku Ripin.
Bisi empat sekula sekondari enggau 12 sekula primari ba Lambir nerima geran MRP diri penyampau RM5,000.
Sekula tu iya nya SMK Luar Bandar, SMK Sains, SMK Agama, SMK Taman Tunku, SJK Tukau, SK Lambir Village, SK Kelapa Sawit No. 2, SK Kpg Subak, SJK Ulu Satap, SJK Chung Hua Bakam, SK Tawakal Satap Bekenu, SK Temenggong Datuk Muip, SK Keluru Tengah, SK Kelapa Sawit No 1, SK Kampung Beraya enggau SK Kampung Bakam.