Saup ari mensia mayuh deka mantu juluk BDA nyadi nyata
BINTULU: Saup ari mensia mayuh deka ulih mantu piak bekuasa kandang menua Bintulu nyapai juluk nempa mengeri tu nyadi sebengkah mengeri ke pemadu beresi sereta manah.
Menteri Kaunsil Kandang Menua enggau Pengawa Berumah, Datuk Dr Sim Kui Hian madah, kitai patut belajar baka ni Sibu enggau Kaunsil Mengeri Besai Miri nyaga mengeri sida lalu utai ke berat ukai ketegal orang ke mangku pengawa nyadi datuk bandar tauka menijar besai sesebengkah mengeri tang ketegal kerejasama ari peranak dia empu.
“Peranak dia empu ulih ngubah nya, nyadi mata enggau pending piak bekuasa kandang menua sereta nyadi sebagi ari raban ke nyaup ngaga pemanah ukai semina mejah aja tang nentuka servis ke disedia bejalai enggau mujur.
“Peranak patut besaup bekunsika penemu dalam nyapai juluk tu<’ ku iya rambau bejadika Program Bintulu Townhall diatur BDA ba Auditorium Lembaga Kemajuan Bintulu ( BDA) Wisma Bintulu ensanus.
Ku iya, polisi ke dikena piak kaunsil kandang menua enda patut ngasuh mensia mayuh takut tang sida patut ngasai diri gagit nguan menua nya.
Nya alai, ku iya, program ke diatur BDA chukup manah nyadi kimpin dikena ngubah ulah peranak menua tu ngambika badu muai uras sengapa sereta ngelakuka kimpin barang dikena baru dudi hari ila.
“Kitai patut bisi piak ke bebendar ngeringka kimpin tu ba sesebengkah endur lalu ukai semina ba sekula, palan mensia mayuh, taman enggau ke bukai tang mega gerempung-gerempung mega patut bejalaika tanggungpengawa mantu kimpin nyaga pemeresi.
“Kitai begunaka penemu ke inovatif lalu nadai kebuah Bintulu enda ulih nyadi menua ke manah sereta beresi nyema semua patut bekerejasama,” ku iya.
Iya madah, pekara ke berat ukai semina beratika asil tang pangka iya ngagai mengeri enggau orang ke diau dia.
Ku iya, dikena nempa Bintulu nyadi beresi sereta manah, peranak enda patut semina meda tauka mending aja tang patut nyaup ngereja pengawa.
“BDA ngaduka menua ke sebaka pemesai enggau Singapura lalu ngintu mengeri ke nyadi penyungkak penatai pemisi ngagai nengeri enggau menua tu nya kebuah saup ari mensia mayuh dalam ngemansangka mengeri tu beguna amat.
“Endang beguna amat BDA mending sereta nerima sukung ari semua renggat nyengkaum gerempung ukia dikuasa perintah ( NGO), parti politik,
sekula-sekula, ketuai raban bansa, ketuai opis perintah, ketuai opis enggau mensia mayuh dalam bejalaika sesebengkah program ke diperambu,” ku iya.
Ku iya, pendiau Bintulu diatu bebida ketegal penatai mayuh temuai ari menua luar enggau pangka pemansang nyentuk nyadi mengeri ke richah sereta ubah pendiau pengidup meri pangka ngagai mengeri tu.
Berindik ari nya, ku iya tu minta peranak ditu terus nyingkang ke mua nyadi sebuah mengeri pintar sereta masuk ekonomi digital baka ke udah diterantang Kepala Menteri Sarawak.
Bela bisi datai ba program nya Menijar Besai BDA, Rodziah Morshidi; Kaban Kunsil Nengeri Samalaju, Majang Renggi; Sekretari Politik Kepala Menteri, Jenny Bangga enggau Soo Li Ching sereta Temenggung Datuk Barry Yek.