Pengawa ngaga jalai Miri-Mulu nyedia mayuh pengawa puang

MIRI: Pengawa ngaga jalai darat Miri-Mulu deka nyediaka mayuh pengawa puang ngagai peranak ke diau besemaka, ku Kaban Kunsil Nengeri ( ADUN) Piasau, Datuk Sebastian Ting.

Ku iya, jalai ke udah manah dia jemah deka nyungka industri dagang temuai.

“Perambu ngaga jalai ukai semina mantu muka Taman Negara Mulu ngagai temuai ari menua tu enggau entarabansa tang mega meri pemaik ngagai mensia mayuh lebih agi ba sukut penatai pemisi eng- gau nyedia mayuh pengawa puang,”ku iya.

Iya madah munyi nya rambau nimbal perambu Sapit Kepala Menteri Tan Sri Datuk Amar James Masing bekaul enggau pemesai guna ngaga jalai nuju ngagai taman negara.

Ting nengah penerang media iya ensanus madahka perambu Masing endang engkeman enggau jam ke diatu.

Iya ke mega Sekretari Besai Parti Sa’ati Rayat Sarawak (SUPP) madah, pemesai guna jalai Miri-Mulu udah disebut rambau Aum Kunsil Nengeri (DUN) kena bulan November 2016.

“Kelimpah beguna ngagai temuai luar, jalai tu mega meri pemaik ngagai rayat mayuh ukai semina ari Miri tang mega ari Limbang, Lawas, enggau menua Brunei Darussalam,” ku iya.

Ari sukut logistik, jalai ulih digaga nyentuk ngagai pengkalan sungai ke besemak enggau genturung pendiau sereta garis adan taman negara.

Pengkalan tu ulih dipe- jalaika staf taman ti nyediaka perengka guna baka palan paking, kafe, agu enggau kedai nyual produk menua tu.

Ari pengkalan nya ku Ting, temuai semina dikemendar tama ngena perengka pengangkut sungai seraya ke meda pemanah rampa menua ba taman nya dibanding enggau ngena entukar ke mayuh asap.

“Kitai mega ngemeratka pekara pemeresi rampa menua lalu enggau ngelakka sebarang pekara ke ulih ngerusak pemanah rampa menua,” ku iya.