Raban nembiak diperansang ngulu program TEDx Kenyalang
KUCHING: Raban nembiak di nengeri tu diperansang datai ngulu program TEDx Kenyalang ke deka diatur ba BCCK, kena 25 & 26 November tu ila.
Menteri Dagang Temuai, Seni, Main Asal, Nembiak enggau Lumba enggau Main, Datuk Abdul Karim Rahman Hamzah madah, nya peluang endur mensia mayuh kelebih agi raban nembiak bekunsi sereta ngiga penemu baru ari bala pakar ke dikangau bejaku.
“TEDx Kenyalang tu program ke chukup manah, ke ulih ngemaju sereta meri peransang kelebih agi bala nembiak ti deka ngangkatka pengulih tauka penau sereta penemu tinggi agi ari pakar ke udah dulu nyulut ke dikanggau bekunsi penemu enggau pemujur.
“Tu mega meri peluang ngagai bala nembiak nengeri kitai ngempitka kaul enggau pangan diri,” ku iya dalam aum pengarang berita TEDx Kenyalang ti diatur ba bilik aum opis menteri iya ba Begunan Baitulmakmur ditu, ensanus.
Program ti berambaika leka jaku ‘Be the Best’ nya diatur Koperasi Belia Inovatif Sarawak (KOBIS) nengah sukung ari perintah nengeri, Biro Konvensyen Sarawak enggau ke bukai.
Nitih ku Chairman KOBIS Zaiwin Kassim, TED iya nya Teknologi, Pemerindang enggau Langkar ti meri peluang ngagai orang seseiku ke bisi penau enggau pengelandik bekunsi penemu dalam topik bebida.
Juluk pengatur program nya, urung 500 iku orang datai nyengkaum ari menua luar bisi datai ngulu maya nya ila.
Entara pengelicha ke dikangau sereta datai maya nya ila CEO Tune Talk, Jason Lo kelimpah ari Professor Mushtak Al- Atabi, Alvin Wee, Magdalene Muuk, Aziph Mustapha, Sada Borneo Music Band, Dr. M. Abdullah Zaidel, Anthony Sebastian enggau Nilam Sari.
“Nyerumba program tu kami bisi ngatur pekit nulis enggau ngaga tiun lagu bepelasarka rambai jaku ‘Be the Best’. Lalu pemenang deka merindang ba mua mensia mayuh maya TEDxKenyalang sereta deka menang perais mata duit RM3,000,” ku iya.
Pekit nulis enggau ngaga tiun nya dibuka berengkah diatu (17 Ogos 2017) sereta hari ke penudi nganjung penyereta iya nya 27 Oktober 2017, diemail ngagai tedxkenyalang@gmail.com .
Penerang silik bekaul enggau TEDx Kenyalang tau dipeda ba www.tedxkenyalang. comwww. tedxkenyalang. comwww. tedxkenyalang. comwww. tedxkenyalang. com tauka Facebook, Twitter enggau Instagram iya nya TEDxKenyalang, lalu peminta nyadi pesereta enggau pemekit tau dianjung ngagai email curator@tedxkenyalang.com tauka betelefon ngagai 082-238636.